នៅថ្ងៃទី៧ ខែមេសា ឆ្នាំ២០២៣ ធនាគារ ប្រ៊ីដ ដែលជាធនាគារពាណិជ្ជកម្ពុជា បានសហការជាមួយក្រុមហ៊ុន Bellsnord ដែលជាអ្នកផ្ដល់សេវាបច្ចេកវិទ្យាធនាគារឌីជីថលមកពីប្រទេសម៉ាឡេស៊ី រៀបចំ “ពិធីចុះកិច្ចសន្យា លើការសហការផ្ដល់ជូននូវប្រព័ន្ធធនាគារ ឌីជីថល រវាងធនាគារ ប្រ៊ីដ ម.ក និង ក្រុមហ៊ុន BELLSNORD”។

ពិធីចុះកិច្ចសន្យានេះ ប្រារព្ធឡើងដោយមានការចូលរួមជាអធីបតីភាពពីសំណាក់ លោក Gorman Siah នាយកក្រុមហ៊ុន Bellsnord និង លោក Richard Liew នាយកប្រតិបត្តិនៃធនាគារ ប្រ៊ីដ ព្រមទាំងវត្តមាននៃថ្នាក់ដឹកនាំជាន់ខ្ពស់របស់ភាគីទាំងសងខាងជាច្រើនរូបទៀត។

ឆ្លៀតក្នុងឱកាសដ៏ពិសេសនេះ លោក Gorman Siah តំណាងឱ្យក្រុមហ៊ុន Bellsnord បានលើកឡើងថា “យើងនឹងធ្វើការយ៉ាងជិតស្និទ្ធិជាមួយនឹងធនាគារ ប្រ៊ីដ ដោយសម្រេចផ្ដល់ជូននូវដំណោះស្រាយអ៊ិនធឺណេត Demain និងសេវាធនាគារចល័តដ៏ទំនើបបំផុត សម្រាប់បម្រើដល់សេវាធនាគារបុគ្គល ព្រមទាំងសេវាអាជីវកម្មផងដែរ”។

លោក Gorman Siah បានបន្ថែមទៀតថា៖ «ផលិតផល DEMAIN API Gateway ក៏នឹងក្លាយជាផ្នែកមួយនៃការផ្ដល់ជូនរបស់ក្រុមហ៊ុន Bellsnord ដែលអនុញ្ញាតឱ្យធនាគារ ប្រ៊ីដ កម្ពុជា​ ប្រើប្រាស់នូវបច្ចេកវិទ្យាធនាគារ API លំដាប់ពិភពលោក»។

ទន្ទឹមនឹងនោះ នាយកប្រតិបត្តិនៃធនាគារ ប្រ៊ីដ លោក​ Richard Liew ក៏មានប្រសាសន៍បន្ថែមថា៖ «ការផ្លាស់ប្ដូរបច្ចេកវិទ្យាឌីជីថល នឹងគ្របដណ្ដប់លើផ្នែកសំខាន់ៗចំនួន៣ ដើម្បីជួយដល់ធនាគារ ក្នុងការបើកដំណើរការសេវាកម្មឌីជីថលរបស់ខ្លួនគឺ Bridge Mobile សម្រាប់សេវាធនាគារបុគ្គល សាជីវកម្ម និងសេវាធនាគារតាមអ៊ិនធឺណេតសម្រាប់អតិថិជនអាជីវកម្មជាចម្បង និងជាពិសេសបច្ចេកវិទ្យា API សម្រាប់វេទិកាធនាគារបើកចំហ»។

នៅក្នុងការសហការរបស់ភាគីទាំង២ ខាងលើនេះ នឹងធ្វើឱ្យអតិថិជនរបស់ធនាគារ ប្រ៊ីដ ទាំងអស់ទទួលបាននូវសេវាកម្មធនាគារបែបឌីជីថល ប្រកបដោយភាពងាយស្រួល និងសុវត្ថិភាព ទាំងប្រព័ន្ធខាងក្នុងនិងខាងក្រៅ ដូចជាការផ្ដល់សេវាកម្ម និយតករ ទូទាត់វិក្កយបត្រ និងបញ្ចូលទឹកប្រាក់ទូរស័ព្ទជាដើម។

សូមជម្រាបផងដែរថា ធនាគារ ប្រ៊ីដ គឺជាធនាគារពាណិជ្ជក្នុងស្រុកមួយ ដែលមានចក្ខុវិស័យក្នុងការក្លាយជាដៃគូហិរញ្ញវត្ថុសម្រាប់ពេលបច្ចុប្បន្ន និងសម្រាប់មនុស្សជំនាន់ក្រោយ ដោយផ្ដល់នូវសេវាហិរញ្ញវត្ថុគួរជាទីជឿទុកចិត្ត តាមរយៈស្ដង់ដារសេវាកម្មសកលរបស់ខ្លួន និងធ្វើឱ្យការប្រើសេវាកម្មធនាគារ មានភាពងាយស្រួល និងសុវត្ថិភាព៕