ផ្តើមចេញពីអ្នកលក់ផលិតផលគ្រឿងជ័រនាំចូលពីប្រទេសជិតខាង អ្នកស្រី ជា បុប្ផា បានងាកមកផលិតគ្រឿងជ័រដោយខ្លួនឯង ដែលមានទីតាំងស្ថិតនៅក្នុងខេត្តព្រៃវែង ប្រមាណជាង១០០មុខ វាយលុយទីផ្សារពេញស្រុកខ្មែរ ធ្វើឱ្យអតិថិជនមួយចំនួនធំ យល់ច្រឡំស្មានតែជាផលិតផលដែលនាំចូល។

ថ្លែងប្រាប់ Business Cambodia អ្នកស្រី ជា បុប្ផា ម្ចាស់សិប្បកម្ម បុប្ផា ៩៩៩៩ បានរៀបរាប់ឱ្យដឹងថា អ្នកស្រីបានបង្កើតសិប្បកម្មផលិតគ្រឿងជ័រដោយខ្លួនឯងឡើង នៅក្នុងឆ្នាំ២០១៨ ដោយកាលណ្ណោះអ្នកស្រីផលិតបានតែ៥មុខប៉ុណ្ណោះ រួមមានដូចជា កញ្ច្រែង កណ្ថោរ កាធុន និងប៉ោយដងទឹក២មុខទៀត។ ហើយនៅក្នុងឆ្នាំ២០២១ អ្នកស្រីអាចផលិតគ្រឿងជ័រដល់៨០មុខ និងបានពង្រីកការផលិតឱ្យដល់២០០មុខ នៅក្នុងឆ្នាំ២០២២។ ការចាប់ផ្តើមដំបូងអ្នកស្រីចំណាយដើមទុនអស់១០ម៉ឺនដុល្លារ។

អ្នកស្រីបន្តថា មូលហេតុដែលធ្វើឱ្យអ្នកស្រីនិងស្វាមីសម្រេចចិត្តបង្កើតសិប្បកម្ម បុប្ផា ៩៩៩៩នេះឡើង គឺដោយសារអ្នកស្រីមើលឃើញអំពីទីផ្សារខ្ពស់របស់ផលិតផលគ្រឿងជ័រនេះ។ មួយវិញទៀត ដោយសារអ្នកស្រីគិតថា បើអាចផលិតខ្លួនឯងបាន អាចឱ្យអ្នកស្រីចំណេញច្រើន ពីព្រោះការទិញរបស់នាំចូលត្រូវចំណាយថ្លៃដឹកខ្ពស់ និងជាពិសេសអ្នកស្រីចង់ចូលរួមបង្កើតការងារនៅក្នុងស្រុក។  

ចំពោះការធ្វើទីផ្សារវិញ អ្នកស្រី បុប្ផា បានលើកឡើងថា មិនមានបញ្ហាអ្វីឡើយ។ ពីព្រោះពេលដែលអ្នកស្រីផលិតបានគ្រឿងជ័រ៥មុខដំបូងៗនោះ អ្នកស្រីក៏នៅលក់ផលិតផលនាំចូលដដែល ហើយនៅពេលដែលអតិថិជនកម្ម៉ង់ទិញឥវ៉ាន់ពីអ្នកស្រីចំនួន១០មុខ អ្នកស្រីបានណែនាំអតិថិជនឱ្យទិញផលិតផលដែលផលិតដោយអ្នកស្រីបន្ថែមទៀត ហើយពីមួយថ្ងៃទៅមួយថ្ងៃ ដោយសារតែផលិតផលដែលអ្នកស្រីផលិតមានគុណភាពល្អ ធ្វើឱ្យអតិថិជនលក់ដាច់ ហើយបញ្ជាការទិញកាន់តែច្រើន។

ម្ចាស់សិប្បកម្ម បុប្ផា ៩៩៩៩ រូបនេះ បានលើកឡើងថា កក្តាសំខាន់ដែលធ្វើឱ្យសិប្បកម្មអ្នកស្រីជោគជ័យខ្លាំង អាចពង្រីកទីផ្សារ២៥ខេត្តក្រុងនោះគឺដោយសារផលិតផលរបស់ស្រី មានគុណភាពខ្ពស់ជាងផលិតផលនាំចូល ហើយជាផលិតផលដែលមានតម្រូវការខ្ពស់ ព្រោះជារបស់ដែលមនុស្សប្រើប្រាស់ជារៀងរាល់ថ្ងៃ។ មួយវិញទៀត សិប្បកម្មរបស់អ្នកស្រី ក៏អាចផលិតគ្រឿងជ័រមួយចំនួនធំ ទៅតាមតម្រូវការចង់បានរបស់អតិថិជនបានផងដែរ។

ចំពោះការពិនិត្យមើលលើគុណភាពផលិតផល អ្នកស្រី ជា បុប្ផា បានគូសបញ្ជាក់ថា ផលិតផលដែលល្អ គឺអាស្រ័យលើគ្រាប់ជ័រដែលគេយកមកផលិតផល ដោយមិនមានលាយសារធាតុគីមី និងមិនមែនជាគ្រាប់ជ័រដែលគេកែច្នៃចេញពីផលិតផលធ្លាប់ប្រើហើយ។ ហើយគេអាចសម្គាល់ផលិតផលល្អបាន តាមរយៈពណ៌របស់វា មានពន្លឺភ្លឺជាង រលោងជាង ស្វិតជាង និងពុំមានក្លិនស្អុយជ័រនោះឡើយ ៕  

អត្ថបទដោយ៖ ម៉េង សុងលី ប្រធានវេបសាយ Business Cambodia និងជាម្ចាស់ស្នាដៃ សៀវភៅ ដោះខាត (ទំនាក់ទំនងទិញសៀវភៅ តម្លៃ១២ដុល្លារ 070 524 424 )