សម្រាប់ប្អូនៗដែលជាសិស្សថ្នាក់ទី១២ បានត្រៀមខ្លួនហើយឬនៅ? ខណៈនៅមុននេះបន្តិច ក្រសួងអប់រំ យុវជននិងកីឡា បានប្រកាសពីថ្ងៃប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបជាផ្លូវការហើយ ដោយថ្ងៃប្រឡងនឹងប្រព្រឹត្តិឡើងទៅនៅថ្ងៃ (សម័យប្រឡង៖១០ សីហា ២០២៦) ។

ដោយឡែក ការប្រឡងសញ្ញាបត្រមធ្យមសិក្សាទុតិយភូមិ (ឬប្រឡងបាក់ឌុប) សម្រាប់ឆ្នាំ២០២៥ កន្លងទៅគឺបានប្រព្រឹត្ត ឡើងរយៈពេល ២ ថ្ងៃ គឺថ្ងៃទី២៨-២៩ សីហា។ ការប្រឡងបាក់ឌុបកាលពីឆ្នាំ២០២៥កន្លងទៅគឺមានបេក្ខជនចុះឈ្មោះប្រឡងសរុប ១៤៦,៧២០នាក់ ស្រី ៨១,៤៤២នាក់ ក្នុងនោះបេក្ខជនថ្នាក់ វិទ្យាសាស្ត្រ ៤០,៦៧៨នាក់ (ស្រី ២៤,៥១៩នាក់) បេក្ខជនថ្នាក់ វិទ្យាសាស្ត្រសង្គម ១០៦,០៤២នាក់ (ស្រី ៥៦,៩២៣នាក់)។

គួររំលឹកថា ចំពោះការប្រឡងបាក់ឌុបឆ្នាំ២០២៥ កន្លងទៅគឺមានមណ្ឌលប្រឡងសរុប ២៤១មណ្ឌល ត្រូវជា ៥,៩២៤បន្ទប់ ក្នុងនោះថ្នាក់វិទ្យាសាស្ត្រ ៧២មណ្ឌល ត្រូវ ជា ១,៦៥៥បន្ទប់ និងថ្នាក់វិទ្យាសាស្ត្រសង្គម ១៦៩ មណ្ឌល ត្រូវជា ៤,២៦៩បន្ទប់។ ចំនួន គណៈមេប្រយោគទូទាំងប្រទេស និងគណៈកម្មការនានា នៅក្នុងដំណើរ ការសំណេរសរុប ៣១,២០៣នាក់៕