អ្នកលក់ភាគច្រើនតែងតែគិតថា ទាល់តែនិយាយច្រើនទើបមានភ្ញៀវ ទាល់តែដើរតាមភ្ញៀវទើបលក់ដាច់ ប៉ុន្តែពួកគាត់មិនបានដឹងទេថា ភាសាកាយវិការបានដើរតួរយ៉ាងសំខាន់ក្នុងការរកស៊ី។ ជាក់ស្តែងដោយលោក Albert Mehrabian ដែលត្រូវបានគេស្គាល់ថាជាសាស្ត្រាចារ្យផ្នែកចិត្តវិទ្យា ហើយក៏ជាគ្រូបង្វឹកនិយាយជាសាធារណៈ និងអ្នកជំនាញភាសាកាយវិការលោកបានចែងច្បាប់ថា ការប្រាស្រ័យទាក់ទងជាមួយអារម្មណ៍គួរតែប្រើត្រឹមកំរិត៧% ពាក្យសម្តី៣៨% និងកាយវិការ ៥៥%។
ជាមួយគ្នានេះ លោកសាស្ត្រាចារ្យក៏បានលើកយកចំណុចសំខាន់ៗចំនួន ៦ មកចែកជូនអ្នករកស៊ីទាំងឡាយ ដោយអ្នកលក់មិនបាច់និយាយច្រើនពេកទេ មានត្រឹមកាយវិកាទាំងនេះ ក៏អាចឱ្យអតិថិជនចង់ទិញបានដែរ៖
១. រក្សាទំនាក់ទំនងភ្នែកនៅពេលអតិថិជនកំពុងនិយាយ
ការប៉ះភ្នែកបានអនុញ្ញាតឱ្យអតិថិជនដឹងថាអ្នកកំពុងស្តាប់អ្វីដែលពួកគេកំពុងនិយាយ តាមរយៈការរក្សាកែវភ្នែកសម្លឹងទៅកាន់អតិថិជនពេលកំពុងនិយាយ វាប្រាប់ពួកគេថាអ្នកកំពុងយកចិត្តទុកដាក់លើរឿងរបស់ពួកគេ។
ទឹកមុខរបស់អ្នកក៏ដើរតួយ៉ាងសំខាន់ក្នុងរបៀបដែលអតិថិជននឹងមានប្រតិកម្មផងដែរ ប្រសិនបើអ្នកបង្ហាញការអាណិតអាសូរ និងការយល់ចិត្តក្នុងប្រតិកម្មរបស់អ្នក ពួកគេនឹងដឹងថាអ្នកយកចិត្តទុកដាក់ចំពោះបញ្ហារបស់ពួកគេ។
២. អនុវត្តឥរិយាបថល្អ
ឥរិយាបថជាធម្មតាត្រូវបានផ្សារភ្ជាប់ជាមួយនឹងទំនុកចិត្ត ឥរិយាបថកាន់តែល្អ អ្នកកាន់តែមានទំនុកចិត្តចំពោះអតិថិជន។ នេះធ្វើឱ្យវាទំនងជាថាពួកគេនឹងជឿជាក់លើដំណោះស្រាយរបស់អ្នក ជាពិសេសនៅពេលដែលការពន្យល់មានភាពស្មុគស្មាញបន្តិច។
៣. ញញឹមនៅពេលដែលវាសមរម្យ
អ្នកគួរតែស្វែងរកឱកាសដើម្បីញញឹមជាមួយអតិថិជនជានិច្ច ព្រោះវាមិនត្រឹមតែបង្ហាញថាអ្នករីករាយក្នុងការជួយប៉ុណ្ណោះទេ ប៉ុន្តែអ្នកមានអារម្មណ៍ចូលចិត្ត ចំពោះករណីនេះផងដែរ។ ប្រសិនករណីដែលអាកប្បកិរិយារបស់អ្នក មានទឹកមុខមិនពេញចិត្ត ឬមិនចាប់អារម្មណ៍ នោះអតិថិជននឹងដឹងភ្លាមថាការយកចិត្តទុកដាក់របស់អ្នកគឺនៅកន្លែងផ្សេង ហើយមិនផ្តោតលើការដោះស្រាយបញ្ហានោះទេ។
៤. ជៀសវាងចលនាដែលមិនចាំបាច់
នៅពេលនិយាយជាមួយអតិថិជន ឬស្តាប់ការឆ្លើយតបរបស់ពួកគេ ចូរឈរស្ងៀម ហើយកំណត់ចលនាត្រឹមតែដៃរបស់អ្នកប៉ុណ្ណោះ។ កាយវិការដៃអាចជួយបង្ហាញចំណុចមួយ និងបង្ហាញពីភាពរីករាយរបស់អ្នកចំពោះករណីនេះ តែត្រូវប្រាកដថាអ្នកកុំធ្វើវាច្រើនពេក ព្រោះកាយវិការដៃច្រើនពេកក៏អាចរំខានផងដែរ។
ក្នុងករណីដែលអ្នកធ្វើចលនាដែលមិនចាំបាច់អាចរំខានអារម្មណ៍ភ្ញៀវ ឬអាក្រក់ជាងនេះទៅទៀត ពួកគេអាចសង្ស័យថាអ្នកមិនចាប់អារម្មណ៍ក្នុងការសន្ទនា ហើយផ្តោតលើកិច្ចការផ្សេងទៀត។
៥. កុំធ្វើកាយវិការហួសហេតុពេក
បន្ថែមពីលើការទំនាក់ទំនងភ្នែក មានសញ្ញាសម្គាល់រាងកាយផ្សេងទៀតដែលអ្នកអាចប្រើក្នុងអំឡុងពេលស្តាប់ដូចជា ងក់ក្បាលដើម្បីបង្ហាញថាអ្នកយល់ ឬយល់ព្រមជាដើម។
៦. និយាយខ្លាំងៗ ច្បាស់ និងជឿជាក់
ក្នុងករណីដែលអ្នកត្រូវនិយាយ អ្នកត្រូវថាកម្រិតសំឡេងរបស់អ្នកក៏អាចបង្ហាញពីភាពជឿជាក់របស់អ្នកចំពោះការឆ្លើយតបរបស់អ្នកផងដែរ។ ដូច្នេះហើយអ្នកត្រូវប្រាកដថានិយាយឱ្យច្បាស់ហើយជៀសវាងការនិយាយរអ៊ូរទាំ។ យកចិត្តទុកដាក់ចំពោះចង្វាក់របស់អ្នកផងដែរ ព្រោះថាការនិយាយលឿនពេកអាចធ្វើឲ្យអតិថិជនច្រឡំ ហើយទុកឱ្យពួកគេនូវសំណួរច្រើនជាងចម្លើយ។
អត្ថបទដោយ៖ កញ្ញា នៅ ថាត់សណា
