នៅថ្ងៃទី២៩ ខែមីនា ឆ្នាំ២០២៤ នេះ អ្នកឧកញ៉ាវេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាលនិងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានប្រកាសពីការបើកការដ្ឋានសាងសង់អគារសិក្សាថ្មីនៃសាលារបស់ខ្លួននៅក្នុងតំបន់ចំការដូង ភាគខាងត្បូងរាជធានីភ្នំពេញ។

តាមការបញ្ជាក់នៅក្នុងទំព័រហ្វេសប៊ុកអ្នកឧកញ៉ា បានបញ្ជាក់ថា ពិធីបញ្ចុះបឋមសិលាបើកការដ្ឋានសាងសង់អគារសិក្សា មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាចំការដូង នឹងធ្វើឡើងនៅថ្ងៃសៅរ៍ ៦រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣០ ខែមីនា ឆ្នាំ២០២៤។

ជាមួយគ្នានេះដែរ តាមការបញ្ជាក់បន្ថែមពីសាលា អេ អាយ អាយ បានឲ្យដឹងថា អគារសិក្សាសាខាថ្មីនេះ មានរាងជាអក្សរ U ដែលតំណាងលើការប្តេជ្ញាចិត្តរបស់ អេ អាយ អាយ និង អេ អាយ អេស ក្នុងផ្តល់ការអប់រំប្រកបដោយគុណភាពដល់សិស្សានុសិស្សនៅក្នុងសហគមន៍អ្នកសិក្សានៅសតវត្សរ៍ទី២១។

គួររំលឹកផងដែរថា កាលពីទី២៤ ខែមីនា ឆ្នាំ២០២៤ កន្លងទៅថ្មីៗនេះ អ្នកឧកញ៉ាទើបនឹងបានរៀប​ចំប្រារព្ធពិធីបញ្ចុះបឋមសិលាបើកការដ្ឋានសាងសង់អគារសិក្សាថ្មី មជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប អាមេរិកាំង សាខាទួលសង្កែ ដែលដែលគ្របដណ្ដប់លើផ្ទៃដី ១ ម៉ឺនម៉ែត្រការ៉េ មានទីតាំងស្ថិតនៅលើដីឡូត៍លេខ៣៨១G ផ្លូវ១០៣ ភូមិទួលថ្ងាន់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញផងដែរ៕