ក្រុមហ៊ុនលក់រាយ Aeon Mall បានជះទុនទឹកប្រាក់ចំនួន ២០២លានដុល្លារអាមេរិក ដើម្បីសាងសង់ផ្សារទំនើបរបស់ខ្លួននៅ ភាគខាងជើង Ha Long នៃប្រទេសវៀតណាមនៅដើមខែធ្នូនេះ។ នេះបើតាមការចុះផ្សាយពីសារព័ត៌មាន VN Express។

ប្រភពដដែលបានបន្តឱ្យដឹងទៀតថា ផ្សារទំនើប Aeon Mall នឹងបញ្ចប់ការសាងសង់ក្នុងខែមេសា ឆ្នាំ២០២៥ ខាងមុខនេះ ខណៈនាពេលនេះ ហាងលក់រាយរបស់ជប៉ុនមានផ្សារទំនើបចំនួន ៧កន្លែងហើយនៅក្នុងប្រទេសវៀតណាមហើយ។

លើសពីនេះទៅទៀត ថ្មីៗនេះ វៀតណាក៏ទើបតែអនុម័តឱ្យក្រុមហ៊ុនរបស់ជប៉ុនមួយនេះសាងសង់ផ្សារទំនើបតម្លៃរាប់លានដុល្លារនៅក្នុងទីក្រុង Can Tho ក្នុងតំបន់ដីសណ្តទន្លេមេគង្គ បន្ទាប់ពីក្រុមហ៊ុន Aeon Mall បានចាប់ផ្តើមសាងសង់ផ្សារទំនើប ក្នុងខេត្ត Long An ក្នុងខែឧសភានៃឆ្នាំនេះ។ មិនតែប៉ុណ្ណោះ ក្រុមហ៊ុនក៏គ្រោងសាងសង់ផ្សារបន្ថែមទៀតក្នុង ទីក្រុង Thanh Hoa និងទីក្រុង Da Nang នៅភាគកណ្តាលប្រទេសវៀតណាមផងដែរ។

គួរបញ្ជាក់ថា ក្រុមហ៊ុនលក់រាយ Aeon Mall  បានវិនិយោគទឹកប្រាក់សរុបប្រមាណ ១,៥ពាន់លានដុល្លារហើយនៅក្នុងប្រទេសវៀតណាមក្នុងរយៈពេល ១០ឆ្នាំចុងក្រោយមកនេះ៕