នេះគឺជាដំណឹងដ៏ក្រៀមក្រំបំផុត ដោយឯកឧត្តម ជា ចាន់តូ ដែលជាទេសាភិបាលកិត្តិយសធនាគារជាតិនៃកម្ពុជា និងជាតំណាងរាស្រ្តមណ្ឌលខេត្តកំពង់ធំ បានទទួលមរណៈភាពក្នុងជន្មាយុ ៧៣ឆ្នាំ។ ខាងក្រោមនេះ គឺជាប្រវត្តិ និងស្នាដៃធំៗ ដែលឯកឧត្តមបានបន្សល់ទុក៖

នៅក្នុងឆ្នាំ ១៩៩៨ ឯកឧត្តម ជា ចាន់តូ ត្រូវបានតែងតាំងជាទេសាភិបាលធនាគារជាតិនៃកម្ពុជា នៅក្នុងអំឡុងពេលដែលប្រទេសកម្ពុជាកំពុងតែជួបវិបត្តិហិរញ្ញវត្ថុអាស៊ី។ ក្នុងនាមជាទេសាភិបាលឯកឧត្តមបានដឹកនាំកំណែទម្រង់ជាច្រើនក្នុងវិស័យធនាគារនិងបានពង្រឹងប្រព័ន្ធធនាគារនៅកម្ពុជាឱ្យកាន់តែមានភាពរឹងមាំ។

នៅក្នុងតំណែងជាអគ្គទេសាភិបាលធនាគារជាតិនៃកម្ពុជា ឯកឧត្តមត្រូវបានទទួលស្គាល់និងការស្ងើចសរសើរដោយបណ្តាលធនាគារកណ្តាលក្នុងតំបន់និងសកលលោកថាបានដើរតួនាទីយ៉ាងសំខាន់ក្នុងការឱ្យមានភាពធន់និងការអភិវឌ្ឍប្រព័ន្ធធនាគារនៅកម្ពុជា។ ដោយនៅក្នុងនោះឯកត្តម ជា ចាន់តូ មានសមទ្ធិផលធំៗដូចជា៖

• ការដាក់ចេញនិងអនុវត្តន៍វិធានការនានាដើម្បីពង្រឹងបទប្បញ្ញត្តិនិងការត្រួតពិនិត្យធនាគារ
• ការអនុវត្តន៍គោលនយោបាយរូបិយវត្ថុប្រកបដោយភាពប្រុងប្រយ័ត្នដើម្បីជម្រុញនៅស្ថេរភាពម៉ាក្រូសេដ្ឋកិច្ច
• ការខិតខំប្រឹងប្រែងឆ្ពោះទៅសម្រេចឱ្យបានបរិយាប័ណ្ណហិរញ្ញវត្ថុនៅកម្ពុជា
• ការលើកកម្ពស់ការប្រើប្រាស់ប្រាក់រៀល
• ការចូលរួមចំណែកក្នុងការអភិវឌ្ឍន៍វិស័យសេដ្ឋកិច្ចនិងហិរញ្ញវត្ថុដោយបានឆ្លងកាត់នៅបញ្ហាផ្សេងៗជាពិសេសវិបត្តិកូវីដ១៩
• ឯកឧត្តមបានផ្តួចផ្តើមរៀបចំនិងសាងសង់សារៈមន្ទីរសេដ្ឋកិច្ចនិងរូបិយវត្ថុព្រះសីឦសានវរ្ម័ន
• ឯកឧត្តមបានផ្តួចផ្តើមសាងសង់អគារទីស្នាក់ការកណ្តាលថ្មីរបស់ធនាគារជាតិនៃកម្ពុជា

គួរជម្រាបថា ដោយសារមានស្នាដៃដ៏ឆ្នើមក្នុងការរួមចំណែកអភិវឌ្ឍន៍វិស័យធនាគារនិងហិរញ្ញវត្ថុក្នុងតំបន់ ឯកឧត្ត ជា ចាន់តូ ក៏ធ្លាប់បានទទួលបាននៅរង្វាន់ធនាគារកណ្តាលឆ្នើមប្រចាំអាស៊ីប៉ាស៊ីហ្វិកក្នុងចំណោមទេសាភិបាលចំនួន៥ នៅជុំវិញពិភពលោកផងដែរ៕