ធនាគារ អេស ប៊ី អាយ លី ហួរ ទទួលជោគជ័យខ្លាំងនៅលើទឹកដីខេត្ដប៉ៃលិន បន្ទាប់ពីការបើកដំណើរសាខាថ្មីនៅខេត្ដនេះ។ ការពង្រីកវិសាលភាព តាមរយៈការបើកសាខានៅក្រុងប៉ៃលិន ធនាគារ អេស ប៊ី អាយ លី ហួរ ទទួលបានការគាំទ្រយ៉ាងខ្លាំង ពីសំណាក់ប្រជាពលរដ្ឋ និងម្ចាស់អាជីវកម្ម។
បើយោងតាមការផ្ដល់បទសម្ភាសន៍ជាមួយក្រុមការងារ Business Cambodia លោក អ៊ន សុគន្ធ ម្ចាស់អាជីវកម្មទិញ-លក់ មាស នៅផ្សារ ប៉ាហ៊ី ក្រុងប៉ៃលិន បានមានប្រសាសន៍ថា លោក បានប្រើប្រាស់សេវាកម្មឥណទាន ជាមួយធនាគារ អេស ប៊ី អាយ លី ហួរ រយៈពេល ២ ឆ្នាំមកហើយ។
លោក អ៊ន សុគន្ធ បានលើកឡើងថា ធនាគារ អេស ប៊ី អាយ លី ហួរ បានផ្ដល់ភាពងាយស្រួល សេវាកម្មរហ័សទាន់ចិត្ដ លក្ខ័ខណ្ឌមិនស៊ាំញ៉ាំ អត្រាការប្រាក់ទាប ហើយអ្វីដែលពិសេសនោះគឺ ការបត់បែនតាមអតិថិជន និងការបង់សងមានភាពងាយស្រួល ដោយមិនចាំបាច់ទៅដល់ធនាគារ។ ទាំងនេះហើយជាមូលហេតុដែល លោក អ៊ន សុគន្ធ ជ្រើសរើសប្រើឥណទានជាមួយធនាគារ អេស ប៊ី អាយ លី ហួរ ខណៈមានធនាគារយ៉ាងច្រើនក្នុងក្រុងប៉ៃលិន។
ទន្ទឹមនឹងនេះ លោក វួច ធុច ម្ចាស់សិប្បកម្មស្រាមៀនប៉ៃលិន បានសំដែងការពេញចិត្ដជាមួយវត្ដមានរបស់ធនាគារ អេស ប៊ី អាយ លី ហួរ ក្នុងក្រុងប៉ៃលិន យ៉ាងដូច្នេះថា “តាមគំនិតខ្ញុំ ខ្ញុំគិតថា វាជាការល្អដែលមានវត្ដមានធនាគារ អេស ប៊ី អាយ លី ហួរ ឬធនាគារផ្សេងទៀត មានកាន់តែច្រើនកាន់តែល្អ ដើម្បីផ្ដល់ភាពងាយស្រួលដល់ប្រជាពលរដ្ឋ ពិសេសម្ចាស់អាជីវកម្មដូចជារូបខ្ញុំដែលកំពុងត្រូវការទុនពង្រីកអាជីវកម្ម។ កាលណាមានធនាគារកាន់តែច្រើន យើងមានជម្រើសច្រើន ធនាគារណាមានអត្រាការប្រាក់ទាប លក្ខខណ្ឌងាយស្រួល ខ្ញុំជ្រើសរើសយកធនាគារនោះហើយ”។
មិនខុសពីការលើកឡើងរបស់ម្ចាស់អាជីវកម្មទាំងពីររូបខាងលើ អ្នកនាង ចាន់ ស្រីរ៉ា ពលរដ្ឋរស់នៅក្នុងក្រុងប៉ៃលិន បានឲ្យដឹងថា អ្នកនាងបានជ្រើសរើសប្រើប្រាស់ឥណទានបុគ្គល ជាមួយធនាគារ អេស ប៊ី អាយ លី ហួរ ព្រោះធនាគារនេះបានផ្ដល់កម្ចីខ្នាតតូច ដែលសមស្របតាមតម្រូវការនិងស្ថានភាពរបស់គ្រួសារអ្នកនាង។
អ្នកនាង ចាន់ ស្រីរ៉ា បានបន្ថែមថា កាលពីមុន អ្នកនាងមិនធ្លាប់ប្រើប្រាស់កម្ចីពីធនាគារណាមួយទេ ដោយហេតុថាធនាគារផ្សេងៗមានតែកម្ចីខ្នាតធំ គ្រួសារអ្នកនាងពុំមានលទ្ធភាពប្រើប្រាស់បានឡើយ។ ប៉ុន្ដែនៅពេលវត្ដមានធនាគារ អេស ប៊ី អាយ លី ហួរ អ្នកនាង អាចប្រើប្រាស់កម្ចីខ្នាតតូចនេះ ដើម្បីធ្វើជាដើមទុនបង្កើតអាជីវកម្មបាន។
គួររលឹកផងដែរថា ឥណទានខ្នាតតូចនិងមធ្យម គឺជាការផ្ដល់កម្ចីទៅឲ្យម្ចាស់អាជីវកម្មទាំងឡាយដែលកំពុងត្រូវការទុនបន្ថែម ដើម្បីពង្រីកអាជីវកម្មរបស់ខ្លួនឲ្យធំជាងមុន ដោយទទួលបានទំហំទឹកប្រាក់រហូតដល់ ២០០,០០០ដុល្លារ ជាមួយអត្រាការប្រាក់សមរម្យ រយៈពេលសងរហូតដល់ ៨៤ ខែ ហើយរបៀបបង់សងមានច្រើនជម្រើស និងមានភាពបត់បែនទៅតាមអតិថិជន។
ក្រៅពីផ្ដល់សេវាកម្មប្រាក់កម្ចីនិងដាក់ប្រាក់បញ្ញើសន្សំ ធនាគារ អេស ប៊ី អាយ លី ហួរ មានសេវាកម្មជាច្រើនជូនអតិថិជន ដោយក្នុងនោះមានដូចជា សេវាកម្មផ្ញើរប្រាក់ទៅ-មក ក្រៅប្រទេស តាមប្រព័ន្ធ Ripple និង SWIFT សេវាកម្មដាក់ប្រាក់សន្សំមានច្រើនជម្រើស ដោយទទួលបានអត្រាការប្រាក់ខ្ពស់ រហូតដល់ ៧.៧៥ ភាគរយ។ ធនាគារ អេស ប៊ី អាយ លី ហួរ ក៏មានសេវាកម្មដាក់និងដក ប្រាក់តាមរយៈទូរ ATM/CDM ដែលមានទីតាំងជាច្រើនកន្លែង នៅចាំបម្រើអតិថិជន ២៤ ម៉ោងក្នុងមួយសប្ដាហ៍៕
