កុំអាលខ្ចីលុយគេមករកស៊ី! ការចាប់ផ្តើមអាជីវកម្មមិនចាំបាច់ទាមទារដើមទុនរាប់ពាន់ដុល្លារនោះទេ។ សម្រាប់អ្នកដែលមានថវិកាខើច ឬចង់សាកល្បងសមត្ថភាពរកស៊ីដំបូង ខាងក្រោមនេះជា មុខរបរតូចៗ ៤ មុខ ប្រើដើមទុនក្រោម $៥០ ប៉ុន្តែអាចទាញយកប្រាក់ចំណូលបានរៀងរាល់ថ្ងៃ៖

១.លក់ភេសជ្ជៈត្រជាក់ៗ និងកាហ្វេដបនៅមុខផ្ទះ ឬតាមការិយាល័យ៖ អាចចាយដើមទុន $២០ - $៣៥ សម្រាប់ទិញកែវ ឬដបប្លាស្ទិក ស្ករ កាហ្វេ តែ ទឹកដោះគោខាប់ និងទឹកកក។ ការធ្វើ គ្រាន់តែឆុងកាហ្វេទឹកដោះគោ ឬតែបៃតង ច្រកដបប្លាស្ទិកស្អាតៗ រួចត្រាំទឹកកកក្នុងធុងស្នោ ហើយដាក់លក់នៅលើតុមុខផ្ទះ ផ្ញើលក់តាមការិយាល័យធ្វើការ ឬផុសប្រាប់អ្នកជិតខាង និងមិត្តភក្តិ។ លក់បានលុយស្រស់ភ្លាមៗ និងមានប្រាក់ចំណេញខ្ពស់។

២.លក់អាហារសម្រន់ក្តៅៗ ឬម្ជូរស្រស់តាមការកុម្ម៉ង់៖ ដើមទុនពី $១៥ - $៣០ ដោយទិញផ្លែឈើ (ស្វាយ ម្កាក់ត្របែក) ទិញគ្រឿងប្រឡាក់ (អំបិលម្ទេស ឬទឹកត្រីផ្អែម) ឬគ្រឿងប្រហិត និងថង់ ឬចានប្លាស្ទិក។ ចិតផ្លែឈើ ឬធ្វើម្ជូរក្រឡុកឆ្ងាញ់ៗ ច្រកប្រអប់ ឬថង់ឲ្យស្អាត។ ហើយថតរូបផុសកុម្ម៉ង់ (Pre-Order) ក្នុង Group Facebook Telegram ឬកន្លែងធ្វើការ មុនពេលធ្វើ។ បើកទទួលការកុម្ម៉ង់ព្រឹក ដឹកជញ្ជូនថ្ងៃត្រង់ ឬល្ងាច មិនបាច់ភ័យខ្លាចសល់ស្តុក។

៣.សេវាកម្ម ជើងសារឬភ្នាក់ងារ៖ ដើមទុន ពី $០ -$១០) ដោយចំណាយតែលុយបញ្ចូលកាតទូរស័ព្ទ និងអ៊ីនធើណេត។ របៀបធ្វើ ដើរមើលផ្ទះជួល ដី ឬសម្ភារចាស់ៗរបស់គេដែលចង់លក់ យកមកថតរូបផុសលក់បន្ត ដើម្បីទារប្រាក់កម្រៃជើងសារ។ ការរកចំណូលនេះ គ្មានហានិភ័យ គ្មានការកកស្ទះដើមទុន តែអាចរកប្រាក់កម្រៃបានជាប្រចាំ។

៤.សេវាកម្មបោកគក់ ឬសម្អាតទ្រង់ទ្រាយតូច៖ ដើមទុនពី $១៥ - $២៥) ដោយទិញសាប៊ូបោកខោអាវ ទឹកក្រអូប ថង់ប្លាស្ទិក និងច្រាសដុស។ គ្រាន់តែប្រើប្រាស់ម៉ាស៊ីនបោកខោអាវ និងទីធ្លាហាលខោអាវដែលមានស្រាប់នៅផ្ទះ ទទួលបោក អ៊ុត និងបត់ខោអាវ ឲ្យអ្នកធ្វើការ ឬសិស្សនិស្សិតដែលនៅបន្ទប់ជួលជិតៗនោះ។ ការរកចំណូល គិតថ្លៃជាគីឡូ ឬជាកញ្ចប់ប្រចាំខែ។ ជាសេវាកម្មដែលមនុស្សត្រូវការជាចាំបាច់ និងផ្តល់ប្រាក់ចំណូលទៀងទាត់។

សរុបមក ដើមទុនតូច មិនមែនជាឧបសគ្គទេ អ្វីដែលសំខាន់គឺ ការសន្សំសំចៃ ភាពស្មោះត្រង់ និងសេវាកម្មល្អ។ នៅពេលអាជីវកម្មតូចនេះដើរស្រួល អ្នកនឹងមានដើមទុនពង្រីកវាឲ្យកាន់តែធំដោយខ្លួនឯង ដោយមិនបាច់ជំពាក់បំណុលគេ៕