មនុស្សភាគច្រើននៅពេលខ្លួនធ្វើល្អហើយជួបមនុស្សអាក្រក់ គឺតែងធ្វើគេមានផ្នត់គំនិតមើលស្រាលខ្លួនឯង ហើយបន្ទោសខ្លួនឯងក្នុងការធ្វើជាមនុស្សល្អ។ ទន្ទឹមនឹងនេះយោងតាមការស្រាវជ្រាវចិត្តសាស្រ្តពីប្រភព Global English Editing បានឱ្យដឹងថាមនុស្សដែលមានសញ្ញាទាំង៥នេះ បង្ហាញថាគេជាមនុស្សល្អខ្លាំង ចំពោះមនុស្សជុំវិញខ្លួន លើសពីអ្វីដែលគេគិត។
១. ឆាប់អភ័យទោស៖ អ្នកជាមនុស្សដែល ឆាប់អភ័យទោសឱ្យអ្នកដទៃ អ្នកយល់ថាការលះបង់កំហឹងនិងការបង្កើនការអត់អោនគឺ ដើម្បីសេចក្ដីសុខក្នុងចិត្តផ្ទាល់ខ្លួន។មនុស្សដែលមានសមត្ថភាពក្នុងការអភ័យទោសខ្ពស់ គឺជាសញ្ញានៃភាពចាស់ទុំខាងផ្លូវចិត្តដូច្នេះប្រសិនបើអ្នកជាមនុស្សម្នាក់ដែលឆាប់អភ័យទោសនោះវាជាសញ្ញាបញ្ជាក់ថាអ្នកពិតជាមនុស្សល្អជាងអ្នកគិតទៅទៀត។
២. តែងស្តាប់រឿងអ្នកដទៃ៖ ប្រសិនបើអ្នកជាមនុស្សម្នាក់ដែលស្តាប់ច្រើនជាងអ្នកនិយាយនោះ វាជាសញ្ញាបញ្ជាក់ថាអ្នកជា មនុស្សល្អលើសពីការរំពឹងទុករបស់អ្នកខ្លួនឯងទៅទៀត ជាពិសេសការស្តាប់នូវទុក្ខសោកនិងរឿងរ៉ាវអ្នកដទៃយ៉ាងយកចិត្តទុក និងការឆ្លើយតបតាមរបៀបដែលបង្ហាញថាអ្នកបានយល់ ប្រកបដោយទឹកចិត្តចង់រំលែកអារម្មណ៍។
៣. ធ្វើខុសតែងសារភាព៖ យើងទាំងអស់គ្នាតែងមានកំហុសនិងចំណុចខ្វះខាត ប៉ុន្តែអ្វីដែលមនុស្សល្អធ្វើចំពោះអ្នកដទៃនឹងខ្លួនឯងធ្វើនោះ គឺពួកគេមានសញ្ញានៃការចេះ ទទួលស្គាល់ចំណុចខ្វះខាតរបស់ខ្លួនឯង។ ការទទួលស្គាល់ថាខ្លួនឯងខុសមិនមែនជាសញ្ញានៃភាពទន់ខ្សោយនោះទេ តែជាសញ្ញានៃមនុស្សស្មោះត្រង់ មានភាពឆ្លាតវៃនិងចេះរៀនពីកំហុស។
៤. មិនខ្មាសក្នុងការបង្ហាញអារម្មណ៍៖ ការបើកចំហអំពីអារម្មណ៍ ដោយមិនសូវមានភាពអៀនខ្មាសជាសញ្ញាដែលបង្ហាញពីភាពវៃឆ្លាតខាងផ្លូវអារម្មណ៍របស់អ្នក ថាអ្នកពេញចិត្តនឹងអ្នកជានរណា ហើយថាអ្នកមិនខ្លាចក្នុងការបង្ហាញការពិតអំពីខ្លួនឯង។ មិនថាជាការបញ្ចេញអារម្មណ៍រីករាយ អារម្មណ៍សោកសៅ កំហឹង ឬការភ័យខ្លាចនោះទេ វាជាការបញ្ជាក់ថាអ្នកជាមនុស្សស្មោះត្រង់និងបើកទូលាយ។
៥. យកអាសាអ្នកដទៃខ្លាំង៖ អ្នកតែងមានបេះដូងនៃការធ្វើជាមនុស្សល្អ ចង់បង្កើតផលវិជ្ជមានដល់មនុស្សជុំវិញខ្លួន យកអាសាអ្នកដទៃ ជួយបង្ហាញផ្លូវគេ ណែនាំគេខ្លាចគេធ្វើខុសនេះ ខុសនោះជាដើម ពោលគឺសកម្មក្នុងការធ្វើល្អចំពោះមនុស្សជុំវិញខ្លួន មិនថាជួយមិត្តភ័ក្តិដែលត្រូវការជំនួយឬការរាប់បន្តិចបន្តួចនោះទេ។ ដូច្នេះប្រសិនបើអ្នកជាមនុស្សម្នាក់ដែលតែងលះបង់និងខិតខំបញ្ចេញគំនិត យោបល់និងសកម្មភាពជួយមនុស្សជុំវិញខ្លួនជារៀងរាល់ថ្ងៃ បង្ហាញថាអ្នកជាមនុស្សល្អជាងអ្វីដែលអ្នកបានគិតទៅទៀត។
យ៉ាងណាមិញតាមបទពិសោធន៍ជាក់ស្តែងបានឱ្យដឹង ការធ្វើជាមនុស្សល្អគឺជារឿងត្រឹមត្រូវ ប៉ុន្តែដើម្បីក្លាយជាមនុស្សល្អដែលត្រឹមត្រូវ លុះត្រាតែយើងធ្វើអំពើល្អត្រូវកន្លែង ត្រូវមនុស្ស ត្រូវពេលវេលា និងប្រើបញ្ញាវៀងវៃ ទើបយើងធ្វើល្អដោយមិនខាតបង់៕
អត្ថបទដោយ៖ ពីង ជូអេង
