IQ “Intelligence quotient” គឺជាភាពឆ្លាតវៃផ្នែកបញ្ញាខួរក្បាល ជាធម្មតា​ IQ មនុស្សតែងត្រូវបានគេធ្វើតេស្តនិងវាយតម្លៃលើ ហេតុផលអរូបី ភាសា ល្បឿន ការយល់ដឹងដែលមើលឃើញ ការចងចាំ និងការគណនាគណិតវិទ្យាជាដើម។ ទន្ទឹមនឹងនេះបើយោងតាមការសិក្សាចិត្តវិទ្យាពីអ្នកចិត្តសាស្រ្តបានឱ្យដឹងថា សញ្ញាធំៗ៥បង្ហាញថាអ្នកជាមនុស្សមាន​ កម្រិតបញ្ញា IQ ខ្ពស់ជាងធម្មតា។

១. ឆាប់ចេះឆាប់ចាំ៖ មនុស្សដែលមានកម្រិត IQ ខ្ពស់តែងតែជាអ្នករៀនរហ័ស ងាយចាប់បាន ចេះនិងចងចាំបានរហ័ស មិនថាជាការរៀនជាប្រព័ន្ធ ឬរៀនជាមួយសកម្មភាពក្នុងជីវិតប្រចាំថ្ងៃនោះទេ។ ក្នុងនោះលោក Ronald J. Swatzyna វេជ្ជបណ្ឌិតអាមេរិកផ្នែកប្រសាទនៅ Brain Code Centers បានឱ្យដឹងថា “អ្នកដែលមាន IQ ខ្ពស់មានសមត្ថភាពចាប់យកគំនិតថ្មីៗ បានឆាប់រហ័ស និងអាចរក្សាចំណេះដឹង ដែលបានរៀនយ៉ាងល្អ ធ្វើឱ្យគេពូកែទាំងក្នុងការសិក្សា និងវិជ្ជាជីវៈ” ។

២. ទំនោរអារម្មណ៍ខ្ពស់ (EQ)៖ មនុស្សដែលមាន​ IQ ខ្ពស់តែងមានទំនោរយល់ដឹងអំពីអារម្មណ៍របស់ពួកគេ ហើយកាន់តែស្ទាត់ជំនាញក្នុងការយល់ដឹងពីចិត្ត ពីអារម្មណ៍របស់អ្នកដទៃបានខ្លាំង។ ជាទូទៅមនុស្សដែលមាន IQ ហើយថែមទាំងមាន EQ ទៀត គឺរាប់ថាគេជាមនុស្សខ្លាំងម្នាក់។ ក្នុងនោះបើតាមអ្នកចិត្តវិទូអ្នកស្រី Leslie Dobson បានបន្ថែមថា “អ្នកដែលមាន IQ ខ្ពស់ទំនងជាអាចប្រើការគិតសមហេតុផល ដោយប្រើអារម្មណ៍យល់ដឹងពីខ្លួនឯង និងអ្នកដទៃក្នុងពេលដំណាលគ្នា” ។

៣. ពូកែដោះស្រាយបញ្ហា៖ មនុស្សដែលមាន IQ ខ្ពស់តែងមានស្ទីលនៃការគិតរហ័សនិងត្រឹមត្រូវ អាចស្វែងរកបញ្ហាប្រឈមដ៏ស្មុគស្មាញ និងបង្កើតដំណោះស្រាយប្រកបដោយប្រសិទ្ធភាព។ ក្នុងនោះវេជ្ជបណ្ឌិត Swatzyna បានលើកឡើងថា “មនុស្សដែលមានភាពវៃឆ្លាតខ្ពស់ តែងមានសមត្ថភាពពីកំណើតក្នុងការប្រមើលមើលបញ្ហាដែលអាចកើតមាន និងបង្កើតយុទ្ធសាស្រ្តដើម្បីយកឈ្នះ នាំឱ្យការសម្រេចចិត្តដ៏ល្អ និងការដោះស្រាយបញ្ហាប្រកបដោយប្រសិទ្ធភាព” ។

៤. អាចស្រមើស្រមៃខ្ពស់៖ ការស្រមើស្រមៃ បានផ្សារភ្ជាប់ជាមួយនឹងភាពវៃឆ្លាត និងការច្នៃប្រឌិត ដូច្នេះបើអ្នកតែងតែស្រមើស្រមៃខ្ពស់ អ្នកគឺជាមនុស្សមាន IQ ខ្ពស់។ ក្នុងនោះបើយោងតាមការលើកឡើងលោក James A. Barham បណ្ឌិតផ្នែកអប់រំបានឱ្យដឹងថា “អ្នកក៏អាចមាន IQ ខ្ពស់ផងដែរ ប្រសិនបើអ្នកជារឿយៗតែងសុបិនស្រមើស្រមៃទាំងថ្ងៃ ព្រោះខួរក្បាលដែលមានប្រសិទ្ធភាពខ្ពស់ក្នុងដំណើរការព័ត៌មាន តែងជាប់ទាក់ទងនិងការស្រមៃ” ។

៥. ពន្យល់រឿងស្មុគស្មាញ ឱ្យងាយយល់៖ ប្រសិនបើអ្នកជាមនុស្សដែលអាចពន្យល់រឿងដែលស្មុគស្មាញឱ្យងាយស្រួលយល់ ដល់ដៃគូសន្ទនាក្នុងរយៈពេលខ្លី ជាសញ្ញាបង្ហាញថាអ្នកជាមនុស្សមាន IQ ខ្ពស់។ ក្នុងនោះអ្នកស្រី Leslie Dobson ក៏បានបញ្ជាក់ផងដែរថា “មនុស្សមាន IQ ខ្ពស់តែងនិយាយអំពីគំនិតដ៏ធំរបស់ពួកគេក្នុងភាសាដ៏សាមញ្ញ ពូកែសង្ខេប បញ្ចុះបញូល ហើយថែមទាំងអាចពន្យល់ពីគំនិតដ៏ស្មុគស្មាញដល់សិស្សថ្នាក់ទី៣ផងដែរ” ។

យ៉ាងណាមិញបើតាមការសិក្សាបានបញ្ជាក់ថា មនុស្សដែលមានកម្រិត IQ បញ្ញាពូកែវាងវៃ​ មានទេពកោសល្យខ្ពស់លើជំនាញវិជ្ជាជីវៈហើយ ប្រសិនបើពួកគេមានទំនោរអារ​ម្មណ៍ (EQ) បន្ថែមទៀតនោះគេគឺជាបុគ្គលដ៏ខ្លាំងមួយរូប៕

អត្ថបទដោយ៖ ពីង ជូអេង