ទ្វីបអាស៊ី មានផ្ទៃដីធំបំផុតលើលោក រីឯចំនួនប្រជាជនក៏ច្រើនលើសលុប បើធៀបនឹងទ្វីបដទៃទៀត ខណៈចំនួនមហាសេដ្ឋីក៏មានរាប់រយនាក់ដូចគ្នា។ ខាងក្រោមនេះគឺជាត្រកូលអភិជនទាំង០៥ មានទ្រព្យសម្បត្តិច្រើនបំផុតនៅអាស៊ី ផ្អែកតាមរបាយការណ៍ទស្សនាវដ្តី Forbes គិតត្រឹមថ្ងៃទី០៦ ខែកុម្ភៈ ឆ្នាំ២០២៤៖
១/. គ្រួសារ Ambani
លោក Dhirubhai Ambani ឪពុករបស់លោក Mukesh និងលោក Anil គឺជាស្ថាបនិកដំបូងគេនៃក្រុមហ៊ុនប្រេងនិងឧស្ម័ន Reliance Group ដែលមានទីស្នាក់ការនៅប្រទេសឥណ្ឌា។ បច្ចុប្បន្នត្រកូល Ambani មានទ្រព្យសម្បត្តិសរុបប្រមាណ ៤៤.៨ពាន់លានដុល្លារ និងឈរឈ្មោះលំដាប់លេខរៀងទី១ ក្នុងបញ្ជី។
២/. គ្រួសារ Lee (Byung-Chull)
ក្នុងឆ្នាំ១៩៣៨ លោក Lee Byung-chul បានបង្កើតក្រុមហ៊ុន Samsung ដែលនាំចេញបន្លែផ្លែឈើ និងត្រី។ លោកចាប់ផ្ដើមបោះជំហានរកស៊ីក្នុងវិស័យអេឡិចត្រូនិកក្នុងឆ្នាំ១៩៦៩ ដោយបង្កើតក្រុមហ៊ុន Samsung Electronics មានទីស្នាក់ការនៅប្រទេសកូរ៉េខាងត្បូង។ បច្ចុប្បន្នត្រកូល Lee មានទ្រព្យសម្បត្តិសរុបប្រមាណ ៤០.៨ពាន់លានដុល្លារ និងឈរឈ្មោះលំដាប់លេខរៀងទី២ ក្នុងបញ្ជី។
៣/. គ្រួសារ Kwok
លោក Kwok Tak-seng ដែលត្រូវជាឪពុករបស់លោក Walter, Thomas និង Raymond គឺជាស្ថាបនិករបស់ក្រុមហ៊ុនអភិវឌ្ឍអចលនទ្រព្យ Sun Hung Kai Properties បង្កើតឡើងក្នុងឆ្នាំ១៩៦៣ មានស្នាក់ការនៅទីក្រុងហុងកុង ប្រទេសចិន។ បច្ចុប្បន្នត្រកូល Kwok មានទ្រព្យសម្បត្តិសរុបប្រមាណ ៤០.៤ពាន់លានដុល្លារ និងឈរឈ្មោះលំដាប់លេខរៀងទី៣ ក្នុងបញ្ជី។
៤/. គ្រួសារ Chearavanont
ក្រោយត្រឡប់មកពីប្រទេសចិនវិញ លោក Chia Ek Chor រួមជាមួយនឹងកូនប្រុសច្បងឈ្មោះ Choncharoen Chiaravanont បានបើកហាងលក់គ្រាប់ពូជដែលនាំចូលពីប្រទេសចិនដល់កសិករថៃនៅឆ្នាំ១៩២១ និងបានពង្រីកការរកស៊ីជាបន្តបន្ទាប់រហូតអាចបង្កើតក្រុមហ៊ុន Charoen Pokphand Group ដែលជាក្រុមហ៊ុនផលិតចំណីសត្វ និងបសុសត្វដ៏ធំបំផុតមួយរបស់ពិភពលោក។ បច្ចុប្បន្នត្រកូល Chearavanont មានទ្រព្យសម្បត្តិសរុបប្រមាណ ៣៦.៦ពាន់លានដុល្លារ និងឈរឈ្មោះលំដាប់លេខរៀងទី៤ ក្នុងបញ្ជី។
៥/. គ្រួសារ R. Budi & Michael Hartono
ត្រកូល R. Budi & Michael Hartono នៅតែជាមហាសេដ្ឋីដែលមានទឹកប្រាក់ច្រើនបំផុតក្នុងប្រទេសឥណ្ឌូណេស៊ី។ ពួកគេមានទ្រព្យសម្បត្តិសរុប ៣២ពាន់លានដុល្លារ ដែលទទួលបានមកពីវិស័យធនាគារ និងការវិនិយោគថ្នាំជក់ ហើយបច្ចុប្បន្នកំពុងឈរឈ្មោះលំដាប់លេខរៀងទី៥ ក្នុងបញ្ជីគ្រួសារមានជាងគេបំផុតនៅអាស៊ី៕
អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម
https://t.me/BusinessCambodiaBook
