២/.ប៉ា/ម៉ាក់ពិតជាមានមោទកភាពចំពោះកូនណាស់៖ មិនថាកូនៗមានអាយុប៉ុន្មាន ពួកគេតែងចង់ដឹងថា ឪពុកម្តាយមានមោទកភាពចំពោះបុគ្គលដែលខ្លួនក្លាយទៅជា និងអ្វីដែលពួកគេសម្រេចបានឬអត់។ អ្នកនិពន្ធ Jor-El Caraballo បានលើកឡើងថា៖ «ឪពុកម្តាយដែលមានវ័យចំណាស់ជាច្រើន ប្រាថ្នាចង់ឲ្យកូន មានការខិតខំប្រឹងប្រែង និងអាចកសាងសមិទ្ធផលច្រើនជាងអ្វីដែលខ្លួនផ្តល់ឲ្យកូនៗ»។ ពាក្យថា “ខ្ញុំមានមោទកភាពចំពោះអ្វីដែលអ្នកបានធ្វើ ឬអ្នកជានរណាក្នុងថ្ងៃនេះ” ជាថាមពលនៃពន្លឺ និងភាពជឿជាក់សម្រាប់កូនៗ។

៣/. ផ្លូវជីវិតរបស់កូនអាចខុសពីប៉ា/ម៉ាក់ តែប៉ា/ម៉ាក់នៅតែគាំទ្រកូនជានិច្ច៖ ឪពុកម្តាយខ្លះ ចង់ឲ្យកូនដើរតាមគន្លងផ្លូវជីវិតរបស់ខ្លួន ព្រោះយល់ថាវាជារឿងត្រឹមត្រូវបំផុត។ ប៉ុន្តែមនុស្សម្នាក់ៗមានគោលដៅជីវិតខុសៗគ្នា ចូរបើកចិត្តគោរព និងគាំទ្រចំពោះការសម្រេចចិត្តរបស់កូន ទោះពួកគេមិនចង់ធ្វើដូចអ្នកក៏ដោយ។ អ្នកស្រី Morales Daitter បាននិយាយថា៖ «អនុញ្ញាតឲ្យកូនៗមានស្វ័យភាពជ្រើសរើសជីវិតផ្ទាល់ខ្លួន វាបង្ហាញពីការទទួលយក និងជំរុញអារម្មណ៍នៃភាពរឹងមាំ រួមទាំងសុខុមាលភាពផ្លូវចិត្តផងដែរ»។

៤/. តើកូនចង់បានដំបូន្មាន ឬចង់ឲ្យប៉ា/ម៉ាក់ស្តាប់កូន៖ អ្នកស្រី Glover Tawwab បានលើកឡើងថា ការសួរដោយផ្ទាល់ តើកូនកំពុងស្វែងរកការណែនាំ ឬគ្រាន់តែចង់មានអ្នកស្តាប់ បង្ហាញពីភាពជឿជាក់ដែលឪពុកម្តាយទុកចិត្តលើសមត្ថភាពកូន ថាពួកគេធំហើយ អាចដោះស្រាយបញ្ហានោះដោយខ្លួនឯងបាន។

៥/. ប៉ា/ម៉ាក់នឹងឈរនៅទីនេះសម្រាប់កូនជានិច្ចណា៖ គ្មានអ្វីដែលអាចផ្តល់ភាពកក់ក្តៅ និងក្តីសុខ ដូចនៅពេលដឹងថា បើទោះបីខ្លួនឈានចូលដល់វ័យឯករាជ្យក្តី តែនៅមានឪពុកម្តាយឈរពីក្រោយ ចាំលើកទឹកចិត្ត និងផ្តល់ស្មាឲ្យកូនផ្អែកពេលជួបទុក្ខលំបាកឡើយ។ នេះគឺជាចំណងដ៏រឹងមាំ ដែលធ្វើឲ្យកូនៗកាន់តែគោរព ស្រលាញ់ និងដឹងគុណ ឪពុកម្តាយទ្វេដង។

យ៉ាងណាមិញ មេរៀនសម្រាប់អ្នកដែលក្លាយទៅជា ឪពុកម្ដាយគួរតែដឹងអំពីឥទ្ធិពលរបស់ខ្លួនមកលើកូនៗ ព្រោះពួកគេមើលមកអ្នកមុននរណាទាំងអស់។ អ្នកអាចធ្វើឲ្យកូនៗរបស់ខ្លួនក្លាយទៅជាអ្វីមួយក៏បានតាមតែចិត្តចង់ ចង់ឲ្យពួកគេជោគជ័យ ឬក្លាយទៅជាជនឥតបានការក៏បាន វាអាស្រ័យទៅនឹងពាក្យសម្តី និងសកម្មភាពប្រចាំរបស់អ្នកនេះឯង៕