១/. មិត្តភក្តិ និងគ្រួសារ

ការបង្កើតទំនាក់ទំនងជិតស្និទ្ធជាមួយមនុស្សដែលអ្នកទុកចិត្ត និងជឿជាក់គឺមានសារៈសំខាន់ចំពោះសុខុមាលភាពទូទៅរបស់អ្នកណាស់។ លោក Chopra និយាយថា៖ «ជ្រើសរើសមិត្តដោយភាពវ័យឆ្លាត ហើយអបអរអ្វីគ្រប់យ៉ាងសូម្បីតែរឿងតូចតាច និងបង្កើតការចងចាំល្អៗជាមួយពួកគេ»។

អ្នកស្រាវជ្រាវក៏បានព្រមានផងដែរថា ភាពឯកកោផ្ទាល់ខ្លួន និងភាពឯកោក្នុងសង្គមអាចប៉ះពាល់ដល់សុខភាពដូចជាការជក់បារី ១៥ដើមក្នុងមួយថ្ងៃ។ ចំណែកឯមិត្តភាពអាច កាត់បន្ថយហានិភ័យនៃការស្លាប់ ឬវិវត្តទៅជាជំងឺមួយចំនួន និងអាចបង្កើនល្បឿននៃការជាសះស្បើយឡើងវិញចំពោះអ្នកដែលធ្លាក់ខ្លួនឈឺថែមទៀតផង។

២/. ការអភ័យទោស

លោក Chopra បានលើកឡើងថា៖ «សមត្ថភាពក្នុងការអត់ទោសមិនថាចំពោះខ្លួនឯង ឬអ្នកដទៃនោះទេ វានឹងជួយអ្នករួចផុតពីបន្ទុកនៃការស្អប់និងអារម្មណ៍មិនល្អផ្សេងទៀតដែលអាចជះឥទ្ធិពលអវិជ្ជមានដល់កម្រិតសុភមង្គលរបស់អ្នក»។

លោកបានលើកឧទាហរណ៍ពី Nelson Mandela ជា​វីរបុរសមានភាព​ស្ទាត់ជំនាញ​លើសិល្បៈ​នៃ​ការ​អភ័យទោស។ នៅឆ្នាំ១៩៩០ ពេលដែលមេដឹកនាំបដិវត្តន៍ប្រឆាំងការរើសអើងជាតិសាសន៍អាហ្វ្រិកខាងត្បូង និងជាអ្នកនយោបាយដ៏មានឥទ្ធិពលរូបនេះ មានសេរីភាពឡើងវិញបន្ទាប់ពីជាក់គុក២៧ឆ្នាំ គាត់ត្រូវបានគេសួរថា តើគាត់មានការអាក់អន់ចិត្តចំពោះអ្នកចាប់ឃុំខ្លួនគាត់ដែរឬទេ? លោក Mandela បានឆ្លើយតបថា៖ «ខ្ញុំគ្មានភាពជូរចត់ ខ្ញុំពុំមានការអន់ចិត្តទេ។ ការអាក់អន់ចិត្តគឺប្រៀបដូចជាថ្នាំពុល អ្នកផឹកថ្នាំពុលនោះ ហើយបែបជាសង្ឃឹមថាវានឹងសម្លាប់សត្រូវរបស់អ្នកទៅវិញ»។

៣/. ការផ្តល់ឲ្យ

លោក Chopra និយាយថា៖ «ការចូលរួមក្នុងកម្មវិធីសប្បុរសធម៌ និងការបរិច្ចាគប្រាក់ដើម្បីជួយអ្នកដទៃ គឺជាវិធីសាស្ត្រដ៏ល្អបំផុតមួយក្នុងការចំណាយពេលវេលា និងប្រាក់របស់អ្នកបានត្រឹមត្រូវឆ្ពោះទៅរកសុភមង្គលពិតប្រាកដ»។ ក្នុងនោះការសិក្សាស្រាវជ្រាវថែមទាំងបានបង្ហាញថា មនុស្សដែលស្ម័គ្រចិត្ដ ឬចូលចិត្តចែករំលែកទៅកាន់អ្នកដទៃនឹងទទួលបានសុភមង្គលកាន់តែច្រើន ការគោរពខ្លួនឯងខ្ពស់ ក៏ដូចជាមានអត្រាមរណភាពទាបផងដែរ។

៤/. ការដឹងគុណ

លោក Chopra ប្រាប់​ទស្សនិកជន​ថា៖ «មាន​សម្រង់សម្តី​អនាមិក​ដ៏​អស្ចារ្យ​មួយ​បានលើកឡើងថា "ប្រសិន​បើ​អ្នក​មិន​ចេះ​ភាសា​នៃ​ការ​ដឹងគុណ អ្នក​នឹង​មិន​អាចប្រើភាសានិយាយស្តីប្រកប​ដោយ​សុភមង្គល​ឡើយ"»។ ការអនុវត្តការដឹងគុណអាចមានលក្ខណៈសាមញ្ញដូចជានិយាយថា «ខ្ញុំដឹងគុណ» យ៉ាងហោចណាស់ម្តងក្នុងមួយថ្ងៃ។ ជាការពិត ការសិក្សាមួយពីសមាគមចិត្តសាស្រ្តអាមេរិកបានរកឃើញថា ការធ្វើដូច្នេះអាចជួយមនុស្សឱ្យទទួលបាននូវបទពិសោធន៍វិជ្ជមាន ទប់ទល់នឹងស្ថានភាពស្ត្រេស និងពង្រឹងទំនាក់ទំនង។

សរុបមកវិញ ប្រសិនបើថ្ងៃនេះអ្នកមានមហាសំណាងឈ្នះឆ្នោត២០លានដុល្លារ ឬច្រើនជាងនេះ វាមិនអាចនាំក្តីរីករាយមកកាន់ជីវិតអ្នកជារៀងរហូតឡើយ ហើយវានឹងរសាយបាត់ទៅវិញបន្តិចម្តងៗ។ ចូលមានមិត្ត និងក្រុមគ្រួសារល្អ ចេះអភ័យទោស មានសណ្តានចិត្តចែករំលែក និងការដឹងគុណ ទើបអាចនាំអ្នកទៅរកសុភមង្គលពិតប្រាកដ។ ដូចអ្នកប្រាជ្ញសូក្រាតធ្លាប់បានលើកឡើងថា៖ «សុភមង្គលមិនកើតចេញពីស្ថានភាពផ្លូវកាយ ឬរបស់ខាងក្រៅដូចជាការសប្បាយខាងរូបកាយ ឬទ្រព្យសម្បត្តិ និងអំណាចនោះទេ ប៉ុន្តែវាបានមកពីការរស់នៅដែលត្រឹមត្រូវសម្រាប់ដួងព្រលឹងរបស់អ្នក ដែលជាសេចក្តីល្អដ៏ជ្រាលជ្រៅរបស់អ្នកនេះឯង»៕