ហាងកាហ្វេ បានក្លាយជាទីពេញនិយម សម្រាប់មនុស្សសម័យសតវត្សទី២១ ដែលគេច្រើនទុកជាកន្លែងជួបជុំពិភាក្សា ធ្វើការ ពិសេសសិស្ស-និស្សិតបានចាត់ទុកហាងកាហ្វេ ជាថ្នាក់រៀនក្រៅម៉ោងទៀតផង។ ដោយសារតែបែបនេះ បច្ចុប្បន្ន ការបើករបរហាងកាហ្វេ ពេញនិយមខ្លាំងណាស់ ហើយមានច្រើនបំផុត មិនថាក្រុងភ្នំពេញឬ តាមបណ្ដាលខេត្តនោះទេ។
ដូច្នេះថ្ងៃនេះ Business Cambodia និងលើកយកហាងកាហ្វេចំនួន៤ កន្លែងដែលកំពុងទាក់ចិត្តយ៉ាងខ្លាំង មិនតែប៉ុណ្ណោះអាចអង្គុយមើលថ្ងៃរះ ថ្ងៃលិចបានម៉ាអ៊ែម៖
១. Brown coffee and bakery សាខាក្រុងព្រះសីហនុ
ហត់នឿយពីការងារ ថ្ងៃឈប់សម្រាកឬចុងសប្តាហ៍ ធ្វើដំណើរតាមរយៈផ្លូវល្បឿនលឿនភ្នំពេញ-ព្រះសីហនុ ចំណាញពេលវេលាតិច មកទទួលអារម្មណ៍ថ្មីហើយប្លែកនៃរសជាតិនៃកាហ្វេដ៏ឈ្ងុយឆ្ងាញ់ អមមកជាមួយបរិយាកាសនិងទេសភាពដ៏ស្រស់ត្រកាល។ កាន់តែពិសេសជាងនេះទៅទៀតអាចអង្គុយមើលថ្ងៃលិច ស្ដាប់សំលេងទឹករលកបានផងដែរ។
ហាងកាហ្វេប្រោន(Brown Coffee and Bakery ) គឺជាម៉ាកយីហោនៃហាងកាហ្វេដ៏ល្បីឈ្មោះ ដែលបានបើកអាជីវកម្មតាំងពីឆ្នាំ២០០៩រហូតមកដល់បច្ចុប្បន្ន ភាពជោគជ័យយ៉ាងខ្លាំងបានជំរុញយីហោកាហ្វេក្នុងស្រុកនេះពង្រីកសាខារបស់ខ្លួនរហូតដល់ខេត្តព្រះសីហនុ ដោយទទួលបានភ្ញៀវទេសចរជាច្រើន។
២.កែបវេស (KEP WEST)
កែបបានផ្លាស់ប្តូរមុខមាត់គួរឲ្យកត់សំគាល់ជាមួយនឹងឆ្នេរខ្សាច់ដ៏សក្បុស ជាមួយគ្នានេះដែរគម្រោងថ្មីមួយដែលបានចាប់ដំណើរការនៅក្នុងខែនេះ មានឈ្មោះថា «ថ្ងៃបាំងឆត្រ» ដែលស្ថិតនៅក្នុងក្រោមក្រុមហ៊ុន Kep West។
ទឹករលក គឺជាសំណង់អគារអាហារដ្ឋានប្រណិតដែលស្ថិតនៅប្របនឹងមាត់ឆ្នេរកែប ដែលរួមមាន ភោជនីដ្ឋាន ហាងកាហ្វេ ជាដើម។ គម្រោងនេះគឺត្រូវបានសាងសង់ដោយយកលំនាំតាមរចនាបថ ធម្មជាតិប្រាកដនិយមស្របតាមទឹករលករបស់សមុទ្រ។
៣. កាហ្វេ Starbucks សាខាខេត្តកំពត
Starbucks ទើបតែប្រកាសជាផ្លូវការនូវការបើកដំណើរការសាខាក្រុងកំពត កាលពីប៉ុន្មានថ្ងៃមុននេះ ខណៈនេះជាសាខាដំបូងគេបង្អស់ដែលស្ថិតនៅ ក្រុងកំពតរបស់ Starbucks នៅចំកណ្តាលក្រុង ក្នុងតំបន់ប្រជុំជន។
សាខាថ្មីនេះ គឺរចនាប័ទ្មខាងក្នុងហាងគឺជាការលាយបញ្ចូលគ្នាយ៉ាងស្រស់ស្អាតរវាងការដេគ័រសម័យ និងបុរាណតាមដង ព្រែកកំពត (ព្រែកទឹកឈូ)។ អគារ «ផ្សារត្រី» ត្រូវបានកសាងតាំងពីសម័យអាណានិគមនិយមបារាំងក្នុងកំឡុង ទស្សវត្សរ៍ ១៩៣០ ហើយកាហ្វេ Starbucks បានរក្សារូបរាងភាគច្រើនឲ្យដូចទៅនឹងសំណង់ដើម។ ការរចនាខាងក្នុងបង្ហាញពីប្រវត្តិសាស្រ្តរបស់អគារមួយនេះ ដែលមានការតុបតែងបែបបុរាណ សម្រាប់បន្ថែមភាពទាក់ទាញរបស់ហាង ។
៤. Tube Coffee មាត់ទន្លេ
នៅជាប់មាត់ទន្លេក្បែរព្រះបរមរាជវាំង យីហោកូនខ្មែរ Tube Coffee បានបើកសម្ពោធសាខាថ្មីរបស់ខ្លួនជាផ្លូវការហើយ កាលខែកញ្ញា ឆ្នាំ២០២៣ ខណៈនេះជាទីតាំងដែល មានបរិយាកាសល្អបំផុត សម្រាប់បងប្អូនមកទទួលអារម្មណ៍ស្រស់ស្រាយ ទេសភាពទន្លេបួនមុខ ពីក្នុងហាងធ្យូបកាហ្វេសាខាមាត់ទន្លេ ដែលបើកទទួលភ្ញៀវជារៀងរាល់ថ្ងៃចាប់ពីម៉ោង៦:៣០ រហូតដល់ម៉ោង១១យប់៕