ទំនាក់ទំនងដៃគូដែលមានអាយុវែង ស្រឡាញ់គ្នាចាស់ព្រឹទ្ធចាស់ព្រេង អាចមិនមែនជាការបញ្ឆេះអារម្មណ៍រំភើប និងភាពទាក់ទាញដូចគ្រាដំបូងនោះទេ។
យ៉ាងណាមិញបើយោងតាមការស្រាវជ្រាវចិត្តសាស្រ្តរបស់ទស្សនាវដ្តី Forbes បានឱ្យដឹងថាគូស្នេហ៍ឬប្តីប្រពន្ធ ប្រសិនបើចង់ឱ្យទំនាក់ទំនងមានសុភមង្គលរឹងប៉ឹង លោកអ្នកត្រូវទទួលស្គាល់និងកុំបំភ្លេចការពិតទាំង៤យ៉ាងដូចខាងក្រោមនេះ។
១. គ្មានភាពស្មើគ្នាគ្រប់យ៉ាងនោះទេ៖ ការពិតមួយនៅក្នុងទំនាក់ទំនងដៃគូមិនថាកំពុង ស្ថិតក្នុងស្ថានភាពគូសង្សារឬប្តីប្រពន្ធនោះទេ យើងត្រូវទទួលស្គាល់ថាជីវិតគូគឺគ្មានភាពស្មើគ្នា គ្រប់ពេលនិងគ្រប់រឿងនោះទេ ប៉ុន្តែវាគឺជាការរក្សាតុល្យភាពមួយឱ្យមានស្ថេរភាព ពោលគឺមិនលើសមិនខ្វះគ្នា។
ឧទាហរណ៍ថាបើម្ខាង A ដួល ម្ខាង B ត្រូវជួយទប់លំនឹងជំហរ ហើយបើម្ខាង B ដួល ម្ខាង A ត្រូវរក្សាកម្លាំងទប់ជំហរម្តង ពីព្រោះគូជីវិតមិនគួររំពឹងទាំងស្រុងថា ដៃគូទាំងសងខាងត្រូវតែមានភាពខ្លាំងដូចគ្នា ឬចាំតែម្ខាងទទួលខុសត្រូវក្នុងទំនាក់ទំនងនោះទេ តែជាការចែករំលែកបន្ទុកគ្នា។
២. ទាមទារការទុកចិត្តគ្នា ទៅវិញទៅមក៖ ដើម្បីរក្សាទំនាក់ទំនងបានយូរអង្វែង ទំនុកចិត្តគឺជារឿងសំខាន់បំផុត ព្រោះបើដៃគូទាំងសងមិនទុកចិត្តគ្នានោះទេ ក៏គ្មានការនិយាយបើកចំហដែរ ហើយវានឹងបង្កើនជំងឺស្នេហាថប់អារម្មណ៍ ដែលប្រឈមនឹងការបែកបាក់។
តាមការស្រាវជ្រាវរបស់ Forbes បានបង្ហាញថា ការជឿទុកចិត្តគ្នាទៅវិញទៅមក ការទាក់ទងគ្នាដោយអារម្មណ៍ជឿជាក់ ដៃគូនឹងអាចជួយគ្នាគាំទ្រដល់គោលដៅសំខាន់ផ្ទាល់ខ្លួន និងគោលដៅរួមសំខាន់ៗផងដែរ។
៣. ជាការបំពេញឱ្យគ្នា៖ ប្រសិនបើដៃគូម្នាក់តែងតែផ្តល់ឲ្យ ហើយម្នាក់ទៀតចាំតែទទួលនោះ ថ្ងៃណាមួយនៅពេលទំនាក់ទំនងដៃគូអស់ភាពរំភើប ការប្រេះឆានឹងកើតមាន។
ពីព្រោះទំនាក់ទំនងយូរអង្វែងជាការបំពេញឱ្យគ្នាទៅវិញទៅមក ពោលគឺជាការយល់ដឹងពីកំខ្សោយគ្នា ទទួលស្គាល់ចំណុចខ្វះខាតគ្នានិងព្យាយាមគាំទ្រកែលម្អគ្នាទៅវិញទៅមក ចែករំលែកបទពិសោធន៍ថ្មីៗ រៀនពីគ្នាទៅវិញទៅមក និងរីកចម្រើនជាមួយគ្នា។
៤. ពិភាក្សាគ្នាឱ្យបានច្បាស់ ពេលរឿងនៅតូច៖ មិនថាគូស្នេហ៍ឬគូស្វាមីភរិយាគឺតែងតែឈ្លោះប្រកែកគ្នាអំពីរឿងតូចតាច ការអាក់អន់ចិត្តតិចតួចដែលមិនបានដោះស្រាយជារឿយៗ តាមពេលវេលានឹងអាចនាំឱ្យទំនាក់ទំនងឈានដល់ការបែកបាក់។
ដូច្នេះដើម្បីរក្សាទំនាក់ទំនងឱ្យបានល្អនិងយូរអង្វែង គូស្នេហ៍ត្រូវប្រាកដថារឿងរ៉ាវតូចៗត្រូវពិភាក្សាគ្នាឱ្យជ្រះសង្ស័យ ប្រកបដោយការគ្រប់គ្រងអារម្មណ៍និងមានបញ្ញា ជាជាងការជាជាងការព្យាយាមយកឈ្នះ និងទុកឱ្យអារម្មណ៍របស់ភាគីទាំងពីរឬម្ខាងណាមួយមានអារម្មណ៍សន្សំរឿងទុកឬការអន់ចិត្តរង់ចាំថ្ងៃផ្ទុះបែកចេញមកក្រៅ៕
អត្ថបទដោយ៖ ពីង ជូអេង
