ជាការពិតណាស់ សៀវភៅគឺជាឃ្លាំងផ្ទុកនូវចំណេះដឹង គំនិតល្អៗ ជម្រុញលើទឹកចិត្តមនុស្ស និងធ្វើឱ្យមនុស្សមានគំនិតចេះច្នៃប្រឌិតនូវអ្វីដែលថ្មីៗ តាមរយៈការអានសៀវភៅដែលល្អៗ ហើយជួយឱ្យជីវិតរបស់យើងមានការផ្លាស់ប្តូរល្អប្រសើរជាងមុន សូម្បីតែរឿងលុយកាក់។

ជុំវិញរឿងនេះដែរ​ Business Cambodia សូមលើកបង្ហាញអំពី សៀវភៅ ៤ក្បាល ដែលល្អបំផុតសម្រាប់ជួយដោះបំណុ.ល និងកសាងហិរញ្ញវត្ថុរឹងមាំគួរអានក្នុងឆ្នាំ ២០២៤ សៀវភៅទាំងនោះរួមមានដូចខាងក្រោម៖

១. សៀវភៅ៖ ២១គោលការណ៍រកស៊ីរឹងមាំ

សៀវភៅនេះផ្ដោតសំខាន់ទៅលើរឿង៣ធំៗគឺ ការគ្រប់គ្រងបុគ្គលិក ដោះបំណុល និងយុទ្ធសាស្រ្តអាជីវកម្ម។ វាអាចជួយលោកអ្នកឱ្យដឹងច្បាស់ពីដើមហេតុនៃបំណុលវ័ណ្ឌក យល់ដឹងពីចរន្តសាច់ប្រាក់ ស្គាល់បំណុលល្អនិងបំណុលអាក្រក់ ចេះវិធីយកប្រាក់ខែ១ដុល្លារដោះបំណុល។ មិនតែប៉ុណ្ណោះអ្នកនិពន្ធក៏បានរំលេចនូវក្បួនដោះបំណុលល្បីៗមួយចំនួន ដែលអាចជាជំនួយ ជួយបន្ថែមគំនិតដល់លោកអ្នកបានថែមទៀតផង។ ២១គោលការណ៍រកស៊ីរឹងមាំ ត្រូវបាននិពន្ធឡើងដោយ លោក សំ កុសល ស្ថាបនិកនៃក្រុមហ៊ុន Baksey Media។

២. សៀវភៅ៖ ដោះខាត

សៀវភៅមួយក្បាលនេះ ល្អខ្លាំងសម្រាប់អ្នកកំពុងមានអាជីវកម្មក្នុងដៃ អានហើយធ្វើឱ្យអ្នកចំណេញបទពិសោធន៍រកស៊ីខ្លួនឯង ៥ឆ្នាំ។ ដោះខាត បង្ហាញអំពីច្រកចេញពីការរកស៊ីខាត បង្កើនប្រាក់ចំណេញទ្វេដង។ អ្នកនិពន្ធបានបង្ហាញច្បាស់ៗអំពីអាវុធទិព្វបំបែកការរកស៊ីខាត ដាស់អាជីវកម្មឱ្យងើបឡើងវិញតាមរយៈយុទ្ធសាស្រ្ត ដាស់យក្សនៅក្នុងក្រុមហ៊ុន ដាស់ចរន្តសាច់ប្រាក់ ដាស់ផលិតផលដ៏ល្អឥតខ្ចោះ និងដាស់ទីផ្សារជម្រុញការលក់។ ដោះខាត ត្រូវបាននិពន្ធឡើងដោយ លោក ម៉េង សុងលី ជាអ្នកស្រាវជ្រាវផ្នែកអាជីវកម្ម និងជាប្រធានវេបសាយ ចាបក្រហម។

៣. សៀវភៅ៖ លុយពិត

សៀវភៅនេះល្អសម្រាប់មនុស្សគ្រប់វ័យ រាប់ចាប់ពីក្មេងវ័យជំទង់ រហូតដល់អ្នកធ្វើការ​ មានគ្រួសារ។ លុយពិត បង្ហាញឱ្យលោកអ្នកស្គាល់ច្បាស់ពីមូលដ្ឋានគ្រឹះធំៗ នៃការធ្វើជាម្ចាស់នៃលុយ យល់ដឹងពីជ្រលងមរណនៃលុយ ព្រមទាំងចេះពីវិធីដាំដើមលុយថែមទៀតផង។ អានសៀវភៅមួយនេះហើយ អ្នកនឹងលែងអាលាក់ហ្ស៊ីជាមួយលុយ ចាយលែងសល់ថ្ងៃ ចំណូលតិចឬច្រើន នៅតែអាចសន្សំទុកបង្កើនទ្រព្យបាន សៀវភៅនេះថែមទាំងអាចបង្រៀនឱ្យអ្នកប្រើលុយត្រូវ រស់នៅមានអនាគត។ លុយពិត ត្រូវបាននិពន្ធឡើងដោយ លោក ទឿយ ហុង អ្នកស្រាវជ្រាវហិរញ្ញវត្ថុ នៃ Business Cambodia។

៤. សៀវភៅ៖ ច្រវាក់ប្រាក់ខែ

សៀវភៅនេះសក្តិសមបំផុតសម្រាប់មនុស្ស៣ក្រុមធំៗគឺ ថ្នាក់ដឹកនាំអាជីវកម្ម អ្នកធ្វើការ និងយុវជនដែលត្រៀមប្រលូកក្នុងជីវិតការងារ។ ថ្នាក់ដឹកនាំអាជីវកម្ម អានហើយនឹងស្គាល់ពីចរិតបុគ្គលិករបស់ខ្លួន  អាចតម្រង់ទិសបុគ្គលិកឱ្យក្លាយជាមនុស្សមានគុណភាព ព្រមទាំងអាចដោះស្រាយបញ្ហាបុគ្គលិកឈ្លោះគ្នា។ អ្នកធ្វើការ អានហើយនឹងដឹងថាខ្លួនឯងកំពុងស្ថិតនៅចំណុចណា គួរប្រើយុទ្ធសាស្រ្តអ្វីដើម្បីធ្វើឱ្យខ្លួនឯងក្លាយជាមនុស្សមានគុណភាព ដឹងថាខ្លួនឯងកើតមកដើម្បីអ្វី ធ្វើការដោយមានគោលដៅច្បាស់លាស់ លែងស្អប់ថ្ងៃចន្ទ។ យុវជន អានសៀវភៅនេះនឹងជួយឱ្យខ្លួនចំណេញពេល១០ឆ្នាំ មិនដើរខុសផ្លូវ មិនរង្វេងគោលដៅ។ ច្រវាក់ប្រាក់ខែ ត្រូវបាននិពន្ធឡើងដោយ អ្នកនិពន្ធ កាន់ ដារ៉ា (ស្មេរពនេចរ) ជាអ្នកស្រាវជ្រាវភាពជាអ្នកដឹកនាំ នៃ Business Cambodia។