ទម្លាប់ពន្យារពេល ពុំមែនកើតឡើងដោយសារភាពខ្ជិលច្រអូសតែមួយមុខនោះទេ ប៉ុន្តែវាច្រើនតែពាក់ព័ន្ធនឹងការគ្រប់គ្រងអារម្មណ៍ និងការរៀបចំប្រព័ន្ធការងារមិនទាន់បានល្អ។ ដើម្បីបញ្ចប់កិច្ចការឱ្យទាន់ពេល និងទទួលបានលទ្ធផលលើសពីការរំពឹងទុក អ្នកអាចសាកល្បងអនុវត្តនូវវិធីសាស្ត្រខួរក្បាល និងបច្ចេកទេសគ្រប់គ្រងពេលវេលាទាំង ៣ ខាងក្រោមនេះ៖

១/. ប្រើច្បាប់ ៥ នាទី៖ ភាគច្រើននៃការពន្យារពេល គឺកើតឡើងនៅពេលយើងគិតថាការងារនោះធំពេក ឬពិបាកពេក រហូតដល់យើងមិនហ៊ានចាប់ផ្តើម។ ដូច្នេះចូរប្រាប់ខ្លួនឯងថា អ្នកនឹងធ្វើការងារនោះតែ ៥ នាទីប៉ុណ្ណោះ រួចនឹងឈប់។ នៅពេលអ្នកចាប់ផ្តើមធ្វើសកម្មភាព ខួរក្បាលនឹងកាត់បន្ថយភាពតានតឹង ហើយភាគច្រើននៅពេលផុត ៥ នាទី អ្នកនឹងមានកម្លាំងរុញច្រានដើម្បីបន្តធ្វើវាឱ្យចប់តែម្តង។

២/. បច្ចេកទេស Pomodoro៖ នេះគឺជាវិធីសាស្ត្រដ៏ល្បីល្បាញក្នុងការរក្សាការផ្ដោតអារម្មណ៍ និងការពារការហត់នឿយខួរក្បាលខ្លាំង។ ចូរដាក់ម៉ោងធ្វើការ ២៥ នាទី (ផ្ដោតឱ្យអស់ពីចិត្ត) រួចសម្រាក ៥ នាទី។ បន្ទាប់ពីធ្វើបាន ៤ ជុំ អ្នកអាចសម្រាករយៈពេលវែងពី ១៥ ទៅ ៣០ នាទី។ ការដឹងថាខ្លួនឯងមានពេលសម្រាកនៅខាងមុខ នឹងជួយឱ្យអ្នកប្រឹងប្រែងធ្វើការបានល្អជាងការគិតថាត្រូវធ្វើការរាប់ម៉ោងគ្មានឈប់។

៣/. បែងចែកការងារតាមច្បាប់ Eisenhower Matrix៖ ពេលខ្លះយើងពន្យារពេល ព្រោះយើងមិនដឹងថាត្រូវធ្វើអ្វីមុន។ ច្បាប់នេះជួយឱ្យអ្នកបែងចែកអាទិភាព ការងារបន្ទាន់ និង សំខាន់ ត្រូវធ្វើភ្លាម។ ចំពោះការងារដែលមិនបន្ទាន់ តែសំខាន់ ត្រូវកំណត់កាលវិភាគធ្វើឱ្យច្បាស់ (នេះជាចំណុចដែលជួយឱ្យអ្នកសម្រេចផលធំ)។ រីឯការងារបន្ទាន់ តែមិនសំខាន់ ប្រគល់ឱ្យអ្នកដទៃធ្វើជំនួស បើអាច។ ចំណែកការងារមិនបន្ទាន់ ហើយក៏មិនសំខាន់ គួរលុបវាចោល។

យ៉ាងណាមិញ ការឈប់ពន្យារពេលពុំមែនជាការបង្ខំខ្លួនឯងឱ្យធ្វើការដូចម៉ាស៊ីននោះទេ ប៉ុន្តែគឺជាការរៀបចំជំហានតូចៗដើម្បីឱ្យខួរក្បាលងាយស្រួលនឹងទទួលយក។ ចាប់ផ្តើមពីកិច្ចការតូចបំផុតនៅថ្ងៃនេះ អ្នកនឹងឃើញថាប្រសិទ្ធភាពការងាររបស់អ្នកនឹងកើនឡើងជាមិនខាន៕

អត្ថបទដោយ៖ កាន់ ដារ៉ា (ម្ចាស់ស្នាដៃសៀវភៅ បុគ្គលិកឆ្នើម)

• សម្រាប់បុគ្គលិកដែលចង់បាន ចំណូលកើន ឡើងតួនាទីលឿន
• ម្ចាស់អាជីវកម្មដែលចង់កសាងក្រុមការងារដែកថែបបង្កើតលទ្ធផលខ្ពស់
• យើងសូមណែនាំសៀវភៅ «បុគ្គលិកឆ្នើម» តម្លៃពេញ ១២$ បើកក់ឥឡូវនេះតម្លៃត្រឹមតែ ១០$ ប៉ុណ្ណោះ។   បញ្ជាទិញតាម https://t.me/BusinessCambodiaBook