ក្រៅពីបណ្តាញសង្គមធំៗរបស់បរទេសដូចជា Facebook, Instagram, X (Twitter) និង Tik Tok ជាដើមនោះ យុវជនកម្ពុជាក៏បានបង្កើតបណ្តាញសង្គមរបស់ខ្លួនផងដែរ និងមានអ្នកចូលប្រើប្រាស់រាប់សែននាក់រួចមកហើយ។ ខាងក្រោមនេះ គឺជាបណ្តាញសង្គមធំៗ៣ បង្កើតឡើងដោយដៃកូនខ្មែរសុទ្ធសាធ៖

១/. Snapkyu

Snapkyu ជាបណ្ដាញសង្គមដែលកើតចេញពីស្នាដៃកូនខ្មែរគឺលោក លី ងៀប ដោយបញ្ចូលនូវមុខងារថ្មីប្លែកជាច្រើន ដែលបណ្ដាញសង្គមធំៗបច្ចុប្បន្នមិនទាន់បានប្រើ។ Snapkyu មិនត្រឹមតែចូលខ្លួនមកជួយដល់សេដ្ឋកិច្ចប៉ុណ្ណោះទេ ពោលគឺវាជារបស់មួយដែលកូនខ្មែរ និងប្រជាជនទូទាំងពិភពលោកអាចលេងបាន ព្រមទាំងបង្ហោះរូប, វីដេអូ, Status, ផ្ញើសារ, ខល, និងអាច Add friend ដោយប្រើ QRCode បានថែមទៀតផង។ បច្ចុប្បន្ននៅលើ Snapkyu បានបន្ថែមនូវមុខងារថ្មីៗជាច្រើន ព្រមទាំងរចនាផ្ទាំង UI ទាំងមូលឱ្យកាន់តែមានភាពទាក់ទាញ ប្រណិតភាព និងស័ក្តិសមសម្រាប់មនុស្សគ្រប់គ្នា ប្រើប្រាស់ប្រចាំថ្ងៃ។

២/. TamNeak

នេះគឺជាបណ្តាញសង្គមរបស់ខ្មែរ ដែលបង្កើតឡើងដើម្បីប្រើប្រាស់ទៅលើការចែករំលែក និងទាក់ទងគ្នាតាមប្រព័ន្ធឌីជីថល។ Tam Neak ត្រូវបានដាក់ឱ្យប្រើប្រាស់ក្នុងឆ្នាំ២០១៩ ជាលក្ខណ: Beta និងដាក់ឱ្យប្រើពេញលេញទាំងនៅលើ iOS និង Android ក្នុងឆ្នាំ២០២១។

ស្ថាបនិករបស់ App Tamneak គឺលោក ចន សី (Jonh sey) ដែលជា Creator មួយរូបមានភាពល្បីល្បាញនៅលើបណ្ដាញសង្គមផ្នែក Reviews Smart Phone និងគ្រឿងអេឡិចត្រូនិកផ្សេងៗ។ នៅក្នុងកម្មវិធីនេះដែរ ក៏បានបញ្ចូលនូវមុខងារពិសេសៗសម្រាប់អ្នកប្រើប្រាស់អាចបង្ហោះរូបភាព សារជាអក្សរ វីដេអូ ព័ត៌មាន ព្រមទាំងអាចឆាតជជែកគ្នាផងដែរ។

៣/.Angkor Social Media

Angkor Social Media គឺជាបណ្ដាញសង្គម ដែលបង្កើតឡើងក្រោមគំនិតផ្ដួចផ្ដើមរបស់ឯកឧត្ដម ដួង តារា ជំនួយការផ្ទាល់សម្ដេចតេជោ និងជារដ្ឋលេខាធិការ ទីស្ដីការគណរដ្ឋមន្ត្រីផងដែរ។ បច្ចុប្បន្ន បណ្តាញសង្គមនេះចាប់ផ្ដើមមានអ្នកប្រើប្រាស់ច្រើន បន្ទាប់ពីដាក់ឱ្យប្រើជាលក្ខណ: Beta។ អ្នកប្រើប្រាស់អាចធ្វើការបង្កើតគណនីផ្ទាល់ខ្លួន ដើម្បីបង្ហោះរូបភាព វីដេអូ ទាក់ទងគ្នាតាមប្រព័ន្ធឌីជីថល ព្រមទាំងស្វែងរកលេខទូរស័ព្ទទំនាក់ទំនងចាំបាច់ ដូចជាខាងមន្ទីពេទ្យធំៗ ប៉ូលិស រថយន្តពន្លត់អគ្គិភ័យ និងរថយន្តសង្គ្រោះបន្ទាន់ថែមទៀតផង។

គួរជម្រាបផងដែរថា ក្រៅពីបណ្តាញសង្គមធំៗទាំង៣ខាងលើ យុវជនខ្មែរក៏បានបង្កើតបណ្តាញសង្គមផ្សេងៗទៀត មានដូចជា iEbuy, Bee Bush, Tok Tok, Sabaylok និង Pouk Mak ជាដើម៕