អបអរសាទរ ទីបំផុតម្រេចខ្មៅរបស់ខ្មែរបានសម្រេចការនាំចេញផ្ទាល់ទៅកាន់ប្រទេសចិនជាផ្លូវការហើយ ដែលដំណាក់កាលដំបូងនេះត្រូវបាននាំចេញក្នុងបរិមាណចំនួន ៣០តោន ជាម្រេចរបស់ក្រុមហ៊ុនខ្មែរឈ្មោះ Sela Pepper ដែលមានកញ្ញា ស៊ឹង សុផា ជា CEO របស់ក្រុមហ៊ុនមួយនេះ។
ថ្លែងប្រាប់សារព័ត៌មាន Business Cambodia កាលពីពេលកន្លងទៅ កញ្ញាបានធ្លាប់លើកឡើងផងដែរថា ម្រេចដែលចេញពីក្រុមហ៊ុនរបស់កញ្ញាពេលនេះកំពុងមានវត្តនៅបណ្តាប្រទេសចំនួន ៧ ប្រទេសដែលរួមមាន កូរ៉េ ជប៉ុន អាល្លីម៉ង ផលែន វៀតណាម ថៃ និង តៃវ៉ាន់ ដែលក្នុងនោះ ម្រេចរបស់កញ្ញាក៏កំពុងត្រៀមដាក់លក់នៅលើវេបសាយយក្សចិន Alibaba ផងដែរ។ ហើយជាលទ្ធផលនៅក្នុងឆ្នាំ ២០២៤ នេះ ម្រេចដែលចេញពីក្រុមហ៊ុន Sela Pepper ក៏សម្រេចការនាំចេញជាផ្លូវការទៅចិនដូចជាការគ្រោងទុកពិតប្រាកដមែន។
គួរបញ្ជាក់ផងដែរថា កាលពីថ្ងៃទី ១១ខែឧសភា ឆ្នាំ ២០២៣ កន្លងទៅ រដ្ឋបាលគយនៃប្រទេសចិនបានបង្ហាញពីបញ្ជីឈ្មោះក្រុមហ៊ុនសហគ្រាសដែលបានចុះបញ្ជីនាំចេញគ្រឿងទេសកម្ពុជាទៅកាន់ប្រទេសចិន ដោយក្នុងនោះមានទីតាំងដាំម្រេចចំនួន ២៨ កន្លែង និងរោងចក្រវេចខ្ចប់ចំនួន ៧កន្លែងត្រូវបានចុះបញ្ជីនិងទទួលបានការអនុញ្ញាតពីភាគីចិនក្នុងការនាំចេញ ៕
