https://business-cambodia.com/static/3fa983bb-1c52-4616-92c9-ac11b8fb4b0ahttps://business-cambodia.com/static/6fee374d-4e52-43a9-aa7a-11a5d3e92b85https://business-cambodia.com/static/91a38920-de5f-4e1d-ae8a-2664df6e29a6https://business-cambodia.com/static/c5d09957-8d57-4388-a42a-df76facbca7f
https://business-cambodia.com/static/07285dec-566c-44df-8c5a-4ae66a742e37https://business-cambodia.com/static/c8b2f50e-c564-420a-b6d3-2b46d693a58d
អត្ថបទ >
ភាពជាអ្នកដឹកនាំ
មុនជួយឱ្យវៀតណាមឈ្នះពានSEA Games 2021 គ្រូបង្វឹករូបនេះធ្លាប់ឈឺចាប់ជាច្រើនដងព្រោះរឿងធំៗទាំងនេះ

Kan Dara

May 23 2022

378

ទីបំផុតក្រុមជម្រើស​ជាតិ U23 ​វៀតណាម បានលើកពានមេដាយមាស ដោយប្រកួតវគ្គផ្តាច់ព្រ័ត្រជាមួយ ក្រុមជម្រើស​ជាតិ U23 ថៃ លទ្ធផល ១-០ លើវិញ្ញាសាបាល់ទាត់កាលពីម្សិលមិញនេះ ក្នុងព្រឹត្តិការណ៍កីឡាស៊ីហ្គេម (SEA Games) លើកទី៣១ ឆ្នាំ២០២១ នៅលើទឹកដីប្រទេសវៀតណាម ចាប់ពីថ្ងៃទី៦ ដល់២២ ខែឧសភា ឆ្នាំ២០២២។

ចុះតើបុរសនៅពីក្រោយខ្នងនៃជ័យជម្នះរបស់ក្រុមជម្រើស​ជាតិ U23 ​វៀតណាមជានរណា? ធ្លាប់ឆ្លងកាត់ប្រវត្តិជូរចត់អ្វីខ្លះទម្រាំមានថ្ងៃនេះ?

លោក Park Hang-seo កើតថ្ងៃទី០៤ ខែមករា ឆ្នាំ១៩៥៩ នៅប្រទេសកូរ៉េខាងត្បូង បច្ចុប្បន្នជាគ្រូបង្វឹកដ៏មានឥទ្ធិពលម្នាក់និងកំពុងដឹកនាំក្រុមជម្រើសជាតិឈុតធំវៀតណាម និង U23 ​វៀតណាម។ រំលឹកទៅអតីតកាល យុវជន Park មិនមែនជាអ្នកជំនាញផ្នែកកីឡាបាល់ទាត់នោះទេ។ ប៉ុន្តែដោយសារតែការព្យាយាម និងក្តីស្រលាញ់ចំពោះវិស័យនេះ រូបគេត្រូវបានជ្រើសរើសឲ្យចូលក្រុមជម្រើសជាតិក្រោមអាយុ២០ឆ្នាំ នៅឆ្នាំ១៩៧៨។

រស់នៅប្រទេសកូរ៉េក្នុងនាមជាគ្រូបង្វឹកម្នាក់ លោក Park បានដឹកនាំក្រុមជម្រើសជាតិកូរ៉េខាងត្បូងឲ្យឈ្នះមេដាយសំរឹទ្ធិក្នុងកីឡាស៊ីហ្គេម (SEA Games) ឆ្នាំ២០០២។ ប៉ុន្មានឆ្នាំក្រោយមកដោយសារតែមានបញ្ហាផ្ទៃក្នុង និងមានការិះគន់ជាខ្លាំង លោកក៏សម្រេចចិត្តលាលែងចេញពីតំណែងជាគ្រូបង្វឹកក្នុងឆ្នាំ ២០០៧ និងចិញ្ចឹមចិត្តចង់ក្លាយជាគ្រូបង្វឹកនៅចិនដីគោក ប៉ុន្តែសំណាងមិនល្អត្រូវបានគេបដិសេធជាច្រើនលើកច្រើនសារ។

បន្ទាប់ពីបរាជ័យម្តងហើយម្តងទៀត ប្រពន្ធលោក Park បានណែនាំលោកឲ្យស្គាល់បុរសម្នាក់ឈ្មោះ Lee Dong-jun ដែលធ្លាប់បម្រើការ និងមានទំនាក់ទំនងយ៉ាងជិតស្និតជាមួយក្រុមវិស័យកីឡាក្នុងតំបន់អាស៊ីអាគ្នេយ៍។ បន្ទាប់ពីអ្នកទាំងពីរបានស្គាល់គ្នា មួយឆ្នាំក្រោយមកលោក Lee ក៏បានហៅទូរស័ព្ទទៅលោក Park ដោយបានសួរថា តើលោក Park មានចំណាប់អារម្មណ៍ចង់ធ្វើជាគ្រូបង្វឹកក្រុមជម្រើសរៀតណាមដែរឬទេ? ក្នុងចិត្តស្ទាក់ស្ទើរមិនទាន់ឆ្លើយយល់ព្រមនៅឡើយ ត្បិតលោកគិតថាគ្រាន់តែចង់ធ្វើជាគ្រូបង្វឹកក្នុងក្លឹបតូចមួយ ម្យ៉ាងទៀតមិនស្គាល់ពីកម្រិតសមត្ថភាពកីឡាករវៀតណាមផង។ យ៉ាងណាមិញគ្រានោះក៏មានម្ចាស់ក្លឹបដ៏ធំមួយរបស់វៀតណាមបានទៅលេងនិងបញ្ចុះបញ្ចូលលោក Park ដល់កូរ៉េខាងត្បូងតែម្តងរហូតលោកទន់ចិត្តព្រមចុះហិត្ថលេខាជាគ្រូបង្វឹករបស់វៀតណាមក្នុងខែសីហា ឆ្នាំ២០១៧។

លោក Park Hang-seo បានក្លាយជាវីរបុរសបាល់ទាត់ដ៏ល្បីបំផុតលើទឹកដីថ្មីដែលបានសម្រេចគោលដៅត្រឹមតែមួយឆ្នាំប៉ុណ្ណោះ។ តាមពិតទៅលោកមានស្នាដៃច្រើនជាងនេះទៅទៀត ហើយភាពលេចធ្លោររបស់លោកក្នុងការបង្វឹកកីឡាករគឺ៖ «លោកចេះបំផុសគំនិតឲ្យក្រុម និងឲ្យក្រុមកីឡាករម្នាក់ៗចេះលេងសាមគ្គីគ្នា រួមទាំងបង្កើតយុទ្ធសាស្ត្រយកប្រៀប» ដែលធ្វើឲ្យក្រុមជម្រើសជាតិវៀតណាមទទួលបានលទ្ធផលល្អបំផុត មិនធ្លាប់មានក្នុងប្រវត្តិសាស្ត្រ និងបានឈ្នះមេដាយមាសព្រឹត្តិការណ៍ស៊ីហ្គេម (SEA Games)ជាលើកដំបូង បញ្ចប់កំណត់ត្រាមិនដែលឈ្នះ៦០ឆ្នាំ។

គួរជម្រាបផងដែរថា បុរសវ័យ៦៣ឆ្នាំរូបនេះ​ មាន​បទពិសោធន៍​ជា​ច្រើន​ក្នុង​​នាម​ជា​អ្នក​ចាត់ការ​ក្លឹប។ លោក​ធ្លាប់​បាន​ដឹកនាំ​ក្លឹប​ធំៗ​នៅ​ក្របខ័ណ្ឌ​បាល់ទាត់​កំពូល​របស់​កូរ៉េខាងត្បូង​ K League មាន​ដូច​ជា ក្រុម Gyeongnam FC, Jeonnam Dragons និង Sangju Sangmu Phoenix ជា​ដើម ក្នុង​រយៈពេល​ជាង​មួយ​ទសវត្សរ៍​មក​នេះ។ អ្វី​ដែល​ពិសេស​បំផុត​ កាល​ពី​ឆ្នាំ​២០០២ លោក​ធ្លាប់​បាន​ចូល​រួម​ដឹកនាំ​កូរ៉េខាងត្បូង​ បាន​លេខ​៤ សម្រាប់​ព្រឹត្តិការណ៍​ World Cup ក្នុង​នាម​ជា​ជំនួយការ​គ្រូ​បង្វឹក។ ពេលចូលជាគ្រូបង្វឹកក្រុមជម្រើសជាតិវៀតណាម លោក Park Hang Seo ត្រូវបាន Fox Sport Asia ដាក់បញ្ជូលទៅក្នុងបញ្ជីឈ្មោះគ្រូបង្វឹកឆ្នើមបំផុតថ្នាក់អាស៊ីដូចទៅនឹងគ្រូបង្វឹកដ៏ល្បីៗដូចជាលោក Alberto Zaccheroni, Guus Hiddink និង Carlos Queiroz ជាដើម។ លោក Park Hang-seo ធ្លាប់បានលើកឡើងយ៉ាងដូច្នេះថា៖ «ជារៀងរាល់ព្រឹក នៅពេលដែលខ្ញុំបានសម្លឹងមើលកែវភ្នែករបស់កីឡាករគ្រប់រូប វាធ្វើឲ្យខ្ញុំមានកម្លាំងចិត្ត កាន់តែរឹងមាំ និងថាមពលយ៉ាងខ្លាំងក្លា»

អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ក្រដាស១សន្លឹក»

ទំនាក់ទំនងតាមរយៈ៖ Facebook Page: Kan Dara ឬ Telegram: 0964997366

ពាណិជ្ជកម្ម

ស្វែងយល់អំពីពួកយើង
ទំនាក់ទំនង​មក​ពួក​យើង
  • Address: Building 422 St. 271, Phum 1,
    Stung Mean Chey Khan MeanChey, Phnom Penh
  • Email: sam.businesscambodia@gmail.com
  • Phone: 017/093 300 755
© 2022 Baksey Media. All Rights Reserved.
Developed by: Neak Panhboth