នៅពេលដែលនិយាយពីការចេញរកស៊ី រឿងចម្បងដែលត្រូវគិតគឺទាក់ទងនឹងដើមទុន ចុះប្រសិនបើមានទុនតិចតួច គួរធ្វើបែបណាទើបអាចចាប់ផ្ដើមអាជីវកម្មមួយបានទៅ។ ជុំវិញបញ្ហានេះដែរលោក សេង ផានិត ស្ថាបនិក Room42 បានបង្ហើបពីទិកនិចដែលអាចយកដើមទុនតិចបង្កើតជាអាជីវកម្មមួយទាញចំណូលបានច្រើន និងមិនងាយដួលរលំ។

តាមរយៈបទសម្ភាសន៍ពីចម្ងាយជាមួយនឹង Business Cambodia លោក ផានិត បានលើកឡើងថា “ពេលយើងនៅក្មេងមានលុយតិចតួចសន្សំទុករកស៊ី រឿងដំបូងបំផុតដែលយើងត្រូវមានគឺចំណេះដឹងផ្នែកអាជីវកម្មដែលយើងចង់បើក” ។ ជាក់ស្ដែងដូចរូបលោក ផានិត ផ្ទាល់អីចឹង មុនពេលដែលចាប់ផ្ដើមបើក Room42 ដែលជាកន្លែងញ៉ាំអី ឬជា Pub គាត់បានសិក្សាពីអាជីវកម្មប្រភេទនេះខ្លាំងមែនទែន មិនមែនគ្រាន់តែសិក្សាលំៗទេ។ ស្ថាបនិករូបនេះបញ្ជាក់ថា ការសិក្សាពីអាជីវកម្មគឺអាចស្រាវជ្រាវតាម Internet, Google និងការដើរមើលដោយផ្ទាល់នៅកន្លែងដែលគេរកស៊ីលើវិស័យដូចយើងចង់បើក។

សហគ្រិនវ័យ២៨ឆ្នាំរូបនេះបានបន្ថែមទៀតថា “បើចង់រកស៊ីអ្វីមួយត្រូវមានចំណេះដឹងលើរឿងនោះឱ្យបានយ៉ាងតិច ៨០%សិនចាំបើកអាជីវកម្ម”។ ត្រង់ចំណុចនេះមានន័យថានៅពេល យើងយល់ពីវាច្បាស់យើងនឹងដឹងថាតើអាជីវកម្មមួយនោះមានអ្វីជារបស់ចាំបាច់ជាងគេ ដែលតម្រូវឱ្យយើងចាយលុយទៅលើវាមុន។ ឧទាហរណ៍ថាបើក Pub មួយ ត្រូវមានសេវាកម្ម ម្ហូបអាហារ ភេសជ្ជៈ បរិយាកាសក្នុងហាង និងភ្លេងជាដើម ដូច្នេះប៉ុន្មានចំណុចនេះហើយជាអ្វីដែលយើងត្រូវចំណាយមុន ហើយរបស់ផ្សេងៗចាំពង្រីកតាមក្រោយ។ បើតាមបទពិសោធន៍របស់លោកផានិតផ្ទាល់ ហាងRoom42 របស់គាត់កាលពីបើកដំបូងមិនទាន់មាន Band ទេ ប៉ុន្តែជាការពិត Pub ត្រូវមានភ្លេងដូច្នេះគាត់បានចាក់ភ្លេងជូនភ្ញៀវជាធម្មតា រហូតដល់មានលទ្ធភាពទើបគាត់ទិញឧបករណ៍តន្ត្រីនិងជួលអ្នកច្រៀងមកតាមក្រោយ។