តម្លៃរបស់ Bitcoin កំពុងស្ថិតនៅក្នុងស្ថានភាពធ្លាក់ចុះជាខ្លាំង ខណៈរូបិយប័ណ្ណគ្រីបតូទាំងអស់បានបាត់បង់តម្លៃអស់ជាង ២ពាន់ពាន់លានដុល្លាររួចហើយ។ ស្របពេលដែលគ្រីបតូកំពុងប្រឈមនឹងភាពដួលរលំ រដ្ឋាភិបាលប្រទេសចិន ក៏បានចេញសេចក្ដីព្រមានថា តម្លៃ Bitcoin នឹងធ្លាក់ដល់សូន្យនាពេលខាងមុន។ នេះបើយោងតាមការចុះផ្សាយរបស់សារព័ត៌មាន South China Morning Post ដែលដកស្រង់ចេញពីអត្ថបទកាសែត Economic Daily ដែលជាកាសែតស្ថិតក្រោមការគ្រប់គ្រងគណៈកម្មការកណ្ដាលនៃបក្សកុម្មុយនីស្តចិន។

ប្រភពដដែលបានឱ្យដឹងថា ពេលនេះរដ្ឋាភិបាលនៅក្នុងទីក្រុងប៉េកាំងកំពុងតែបន្តកិច្ចខិតខំប្រឹងប្រែងដើម្បីរារាំងវិនិយោគិនចិន ពីរាល់សកម្មភាពដែលពាក់ព័ន្ធនឹងរូបិយប័ណ្ណគ្រីបតូទាំងអស់។ អត្ថបទមួយដែលបានចុះផ្សាយដោយ  Economic Daily ជាកាសែតដែលស្ថិតក្រោមគណៈកម្មការកណ្ដាលនៃបក្សកុម្មុយនីស្តចិនដែលកំពុងកាន់អំណាចដោយផ្ទាល់​បានបង្ហាញថា ​“វិនិយោគិនគួរតែប្រុងប្រយ័ត្ន ព្រោះថា Bitcoin គឺគ្មានអ្វីក្រៅពីគ្រាន់តែជាខ្សែកូដឌីជីថល និងកើតពីការទិញចូលក្នុងតម្លៃទាបបន្ទាប់មកលក់ចេញក្នុងតម្លៃខ្ពស់​ ហើយនៅពេលដែលអ្នកវិនិយោគបាត់បង់ទំនុកចិត្តលើវា ឬនៅពេលដែលប្រទេសប្រជាធិបតេយ្យប្រកាសថា Bitcoin ខុសច្បាប់ វានឹងត្រឡប់ទៅកន្លែងដើមរបស់វាវិញ ដែលគ្មានតម្លៃទាល់តែសោះ”។

ទន្ទឹមនឹងគ្នានេះដែរការរឹតបន្តឹងគោលនយោបាយរូបិយវត្ថុនៅក្នុងសេដ្ឋកិច្ចលោកខាងលិចបាននាំឱ្យមានការលក់ចេញជាសកលនូវទ្រព្យសម្បត្តិហានិភ័យជាច្រើន រួមទាំងរូបិយប័ណ្ណគ្រីបតូ ខណៈវេទិការផ្ដល់កម្ចីគ្រីបតូកំពុងកើនឡើង រីឯមូលនិធិការពារហានិភ័យនិងអ្នកចេញកាក់សេ្ថរភាព( Stablecoin)កំពុងជាប់គាំងក្នុងបញ្ហាហិរញ្ញវត្ថុ។