ធនាគារ វីង បានពង្រឹងការប្តេជ្ញាចិត្តរបស់ខ្លួនក្នុងការអភិវឌ្ឍយុវជន ដោយបានចាប់ដៃគូសហការជាមួយស្ថាប័នអប់រំឈានមុខគេចំនួន ៩ បន្ថែមទៀត ដើម្បីផ្តល់ឱកាសកាន់តែច្រើនដល់សិស្ស-និស្សិតកម្ពុជា ក្នុងការទទួលបាននូវបទពិសោធន៍ការងារពិតប្រាកដតាមរយៈតាមរយៈកម្មវិធីអភិវឌ្ឍន៍បុគ្គលិកកម្មសិក្សារបស់ខ្លួន។

ពិធីចុះហត្ថលេខានៃភាពជាដៃគូបានរៀបចំធ្វើឡើងនៅឯអគារធនាគារវីងថៅវើ ដោយមានការចូលរួមពីតំណាងសាកលវិទ្យាល័យ ពាណិជ្ជសាស្រ្ត អេស៊ីលីដា, សាកលវិទ្យាល័យអាមេរិកាំងភ្នំពេញ, សាកលវិទ្យាល័យបៀលប្រាយ, សាកលវិទ្យាល័យ លីមកុកវីង, សាកលវិទ្យាល័យបញ្ញាសាស្រ្តកម្ពុជា, សាកលវិទ្យាល័យអន្តរជាតិ ផារ៉ាហ្គន, អង្គការភាពញញឹមនៃកុមារ, សាកលវិទ្យាល័យពុទ្ធិសាស្ត្រ, និងសាកលវិទ្យាល័យវេស្ទើន។ កិច្ចសហការនេះ  ឆ្លុះបញ្ចាំងពីការរួមកម្លាំងគ្នា​ដើម្បីត្រួសត្រាសផ្លូវសម្រាប់និស្សិតក្នុងការកសាងសមត្ថភាពឱ្យបានរឹងមាំ​ ហើយទទួលបានអាជីពការងារដ៏ល្អ។

គំនិតផ្តួចផ្តើមនេះត្រូវបានបង្កើតឡើងដោយផ្អែកលើភាពជោគជ័យនៃកម្មវិធីអភិវឌ្ឍន៍បុគ្គលិកកម្មសិក្សារបស់ធនាគារ វីង ដែលបានដាក់ឱ្យដំណើរការកាលពីឆ្នាំមុន ដើម្បីជួយដល់យុវជនឱ្យទទួលបាននូវការបណ្តុះបណ្តាលដែលមានរចនាសម្ព័ន្ធច្បាស់លាស់ បទពិសោធន៍អនុវត្តការងារជាក់ស្តែង ក៏ដូចជាជំនាញអភិវឌ្ឍន៍បុគ្គលិកលក្ខណៈផ្ទាល់ខ្លួនដែលមានរយៈពេល ៤ ទៅ ៦ ខែ។ ក្រោយឆ្លងកាត់ការបណ្តុះបណ្តាលយ៉ាងហ្មតចត់ សិក្ខាកាមទាំងអស់នឹងទទួលបាននូវចំណេះដឹងពីវិស័យធនាគារ និងជំនាញទន់ដែលចាំបាច់ ដើម្បីត្រៀមខ្លួនសម្រាប់អាជីពនាពេលអនាគត។

លើសពីការបណ្តុះបណ្តាលនូវជំនាញមួយច្បាស់លាស់ ធនាគារ វីង ក៏មានការផ្តល់ជូននូវទំនុកបម្រុងហិរញ្ញវត្ថុ និងអត្ថប្រយោជន៍សុខភាពផងដែរ ដែលរួមមាន៖ ប្រាក់ឧបត្ថម្ភប្រចាំខែ, ការធានារ៉ាប់រងសុខភាព និងគ្រោះថ្នាក់, រួមទាំងការស្នាក់នៅជាដើម។ អត្ថប្រយោជន៍ទាំងនេះអនុញ្ញាតឱ្យសិក្ខាកាមអាចផ្តោតអារម្មណ៍ទាំងស្រុងលើការកសាងជំនាញ និងសមត្ថភាពរបស់ពួកគេប្រកបដោយភាពជឿជាក់។ ក្រោយបញ្ចប់ការសិក្សាដោយជោគជ័យ សម្រាប់សិក្ខាកាមអ្នកដែលមានឆន្ទៈមោះមុត និងសក្តានុពលខ្ពស់ នឹងត្រូវបានជ្រើសរើសជាបុគ្គលិកបម្រើការងារពេញម៉ោងនៅធនាគារ វីង ដែលប្រែក្លាយពីបទពិសោធន៍នៃការអនុវត្ត​ឆ្ពោះទៅចាប់យកអាជីពពិតប្រាកដ។

លោក ឡៅ សៀងហៃ នាយកគ្រប់គ្រងធនធានមនុស្ស និងវប្បធម៌ការងារនៃក្រុមហ៊ុនរ៉ូយ៉ាល់គ្រុប និងធនាគារ វីង បានលើកឡើងថា៖ “និស្សិតសមនឹងទទួលបានការគាំទ្រខ្លាំងក្លា ដើម្បីឈានជើងចូលទីផ្សារការងារដោយទំនុកចិត្ត ក៏ដូចជារួមចំណែកឱ្យកាន់តែច្រើនសំដៅលើកកម្ពស់សង្គមជាតិរបស់យើងឆ្ពោះទៅមុខកាន់តែប្រសើរឡើង។”

កម្មវិធីអភិវឌ្ឍន៍បុគ្គលិកកម្មសិក្សាមិនត្រឹមតែផ្ដល់ការបណ្ដុះបណ្ដាលប៉ុណ្ណោះទេ ប៉ុន្តែថែមទាំងជួយអភិវឌ្ឍសមត្ថភាពយុវជនក្នុងការកសាងទំនុកចិត្ត ការប្រាស្រ័យទាក់ទងល្អ ក៏ដូចជាការចាប់យកអាជីពដែលពួកគេចូលចិត្ត សម្រាប់ផែនការជីវិតនាពេលអនាគត ដែលនេះគឺជាការកសាងធនធានដ៏ចាំបាច់បំផុតដើម្បីភាពរីកចម្រើនប្រទេសជាតិរបស់យើង។”

កម្មវិធីអភិវឌ្ឍន៍បុគ្គលិកកម្មសិក្សា របស់ធនាគារ វីង បានបង្កើតផលវិជ្ជមានគួរឱ្យកត់សម្គាល់ដែលស្តែងឱ្យឃើញតាមរយៈសមិទ្ធផលអភិវឌ្ឍធនធានយុវជនជាបន្តបន្ទាប់។ មកទល់នឹងពេលនេះ មានកម្មសិក្សាការី ១០២ នាក់បានបញ្ចប់ការសិក្សាពីកម្មវិធីនេះដោយជោគជ័យ ដោយ ៨៥នាក់ បានចូលបម្រើការងារពេញម៉ោងនៅធនាគារ វីង។ ក្នុងនោះដែរ ក៏មាននូវកម្មសិក្សាការីនារីមានចំនួន 1/4 នៃសិក្ខាកាមទាំងអស់ ដែលនេះជាសក្ខីភាពបញ្ជាក់ពីការប្តេជ្ញាចិត្តរបស់ធនាគារ វីង ក្នុងការរួមចំណែកកសាងធនធានមនុស្ស ក៏ដូចជាជំរុញកំណើនប្រកបដោយបរិយាបន្ន និងលើកកម្ពស់សមភាពយេនឌ័រនៅក្នុងសហគមន៍។

គូសបញ្ជាក់ផងដែរ កាលពីខែកក្កដា កន្លងទៅថ្មីៗនេះ ធនាគារ វីង ក៏បានចាប់ដៃសហការជាមួយស្ថាប័នអប់រំចំនួន៦ ផ្សេងទៀត ដើម្បីផ្តល់ឱកាសកម្មសិក្សាបានកាន់តែទូលំទូលាយ។ និស្សិតដែលចាប់អារម្មណ៍នឹងឱកាសកម្មសិក្សានៅធនាគារ វីង អាចទំនាក់ទំនងតាមរយៈស្ថាប័នអប់រំរៀងៗខ្លួន ឬទាក់ទងដោយផ្ទាល់តាមរយៈទំព័រហ្វេសប៊ុកផ្លូវការរបស់ធនាគារ វីង។

ជាមួយនឹងភាពជាដៃគូថ្មីទាំងនេះ ធនាគារ វីង ជឿជាក់ថា យុវជនកម្ពុជាកាន់តែច្រើននឹងទទួលបានបទពិសោធន៍ ការប្រាស្រ័យទាក់ទងល្អ និងជំនាញពោរពេញដោយសមត្ថភាព និងភាពជឿជាក់ ដើម្បីរីកចម្រើនក្នុងទីផ្សារការងារ។ ការណ៍នេះជួយកសាងកម្លាំងពលកម្មរបស់ប្រទេសជាតិឆ្ពោះទៅមុខជាមួយនឹងកាលានុវត្តភាព និងរីកចម្រើនប្រកបដោយសមធម៌ និងភាពធន់៕