តំបន់សេដ្ឋកិច្ចពិសេសថ្មីៗចំនួន ៣ បាននិងកំពុងសាងសង់នៅលើទឹកដីខេត្ដស្វាយរៀង។ ដោយតំបន់សេដ្ឋកិច្ចដែលកំពុងដំណើរការសាងសង់នេះរួមមាន៖ តំបន់សេដ្ឋកិច្ចពិសេស ហ្វុងហ៊្វូ, តំបន់សេដ្ឋកិច្ចពិសេស ហ័រស៊ាំង និងតំបន់សេដ្ឋកិច្ច ហ្វ័រសុន ហ្គីហ្គា។

យោងតាមការចេញផ្សាយ ដោយគណៈកម្មាធិការវិនិយោគកម្ពុជា បានឲ្យដឹងថា កាលពីថ្ងៃទី៣១ ខែមករា ឆ្នាំ២០២៦ ឆ្លៀតក្នុងឱកាសអញ្ជើញចូលរួមក្នុងពិធីពិសាអាហារសាមគ្គីនៃសមាគមសហគ្រាសវិនិយោគបរទេសនៅកម្ពុជា ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានចុះទៅពិនិត្យវឌ្ឍនភាពនៃការអភិវឌ្ឍតំបន់សេដ្ឋកិច្ចពិសេស ខាងលើ និងបានពិនិត្យមើលការរៀបចំអគាររដ្ឋបាលតំបន់សេដ្ឋកិច្ចពិសេស និងការិយាល័យច្រកចេញចូលតែមួយនៅក្នុងតំបន់សេដ្ឋកិច្ចពិសេសទាំងបីនេះ។

ជាមួយគ្នានេះផងដែរ ឯកឧត្តមអគ្គលេខាធិការក៏បានជួបពិភាក្សាការងារជាមួយលោកប្រធានក្រុមហ៊ុនអភិវឌ្ឍន៍តំបន់សេដ្ឋកិច្ចពិសេស ហ័រស៊ាំង អំពីការទាក់ទាញវិនិយោគិនដែលនឹងរើមូលដ្ឋានផលិតកម្មទៅក្រៅប្រទេសឱ្យមកវិនិយោគនៅកម្ពុជាបន្ថែមទៀតសម្រាប់ឆ្នាំ២០២៦ និងការទាក់ទាញនូវកន្សោមឧស្សាហកម្ម ដូចជា ឧស្សាហកម្មផលិតគ្រឿងសង្ហារិម និងឧស្សាហកម្មគាំទ្រផ្សេងៗដែលអាចធានាដល់ស្ថិរភាពនៃខ្សែច្រវាក់ផ្គត់ផ្គង់ក្នុងស្រុក។

ប៉ុន្មានឆ្នាំចុងក្រោយនេះ ខេត្ដស្វាយរៀងបានក្លាយជាទីតាំងដ៏សំខាន់មួយសម្រាប់ការវិនិយោគទាំងក្រុមហ៊ុនក្នុងស្រុក និងក្រៅប្រទេស។ ជាក់ស្ដែងកាលពី ១ ឆ្នាំ២០២៥ កន្លងទៅ ខេត្ដមួយនេះទទួលបានគម្រោងវិនិយោគសរុប ១៣៩​ គម្រោងឈរនៅរៀងទី២ បន្ទាប់ពីខេត្ដកំពង់ស្ពឺដែលទទួលបាន ១៤២ គម្រោងឯណោះ៕