ព្រលានយន្ដហោះអន្ដរជាតិតេជោ គឺជាព្រលានយន្ដហោះធំជាងគេនៅកម្ពុជា ដែលសាងសង់លើផ្ទៃដី ២៦០០ ហិកតា មានទីតាំងស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមានចម្ងាយប្រមាណ ២០ គីឡូម៉ែត្រពីរាជធានីភ្នំពេញ។ តាមការបញ្ជាក់ពីក្រុមហ៊ុនសាងសង់ព្រលានយន្តហោះកម្ពុជា (CAIC) ថ្មីៗនេះបានឲ្យដឹងថា នៅអំឡុងខែកក្កដា ខាងមុខនេះ ព្រលានយន្ដហោះអន្ដរជាតិដ៏ធំនេះ នឹងបើកដំណើរការហោះហើរផងដែរ ខណៈដែលបច្ចុប្បន្នការសាងសង់សម្រេចបាន ៩៤ ភាគរយ។

ជិតដល់ពេលវេលាបើកឲ្យហោះហើរហើយ តើវត្ដមានព្រលានយន្ដហោះអន្ដរជាតិលំដាប់ទី ៩ លើពិភពលោកនេះ ធ្វើឲ្យតម្លៃដីធ្លីនៅតំបន់ក្បែរនោះប្រែប្រួលដល់ណាហើយ?

តាមការបញ្ជាក់ពីលោកស្រី តាំង ហួរ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយិកាក្រុមហ៊ុន Amatak Property Service Co, Ltd មកកាន់ Business Cambodia ថ្មីៗនេះបានឲ្យដឹងថា តម្លៃដីនៅតំបន់ព្រលានយន្ដហោះអន្ដរជាតិតេជោ បច្ចុប្បន្នគឺស្ថិតនៅនៅលើទីតាំង ផ្លូវតូច ផ្លូវធំ និងទំហំដី។ ជាក់ស្ដែងបើដីនៅជាប់ក្រវាត់ក្រុងទី៣ និងមានទំហំតូចៗត្រឹម ១ ហិកតាចុះក្រោមតម្លៃចន្លោះពី ២៥០ ដុល្លារទៅ ៣០០ ដុល្លារក្នុង ១ ម៉ែត្រការ៉េ។ ប៉ុន្ដែសម្រាប់ដីដែលមានទំហំធំៗគឺមានតម្លៃចន្លោះពី ១០០ ដុល្លារទៅ ៣០០ ដុល្លារក្នុង ១ ម៉ែត្រការ៉េ។ 

លោកស្រីបន្ដថា ចំពោះដីដែលនៅជាប់ផ្លូវ ៨០ ម៉ែត្រដែលតភ្ជាប់ពីផ្លូវជាតិលេខ ២ ទៅដល់ព្រលានយន្ដហោះ សម្រាប់ដីទំហំតូចចន្លោះពី ១ ទៅ ២ ហិកតា គឺមានតម្លៃពី ៤៥០ ដុល្លារទៅ ៥០០ ដុល្លារក្នុង ១ ម៉ែត្រការ៉េ។ ប៉ុន្ដែសម្រាប់ដីធំៗដែលមានទំហំរាប់ហិកតាអាចមានតម្លៃចន្លោះ ៤០០ ដុល្លារចុះក្រោមក្នុង ១ ម៉ែត្រការ៉េ។

យ៉ាងណា ដីធ្លីនៅតំបន់ជុំវិញគម្រោងព្រលានយន្ដហោះអន្ដរជាតិដ៏ធំនេះ ដ៏មានដីដែលមានតម្លៃចន្លោះពី ៥០ ដុល្លារទៅ ១០០ ដុល្លារក្នុង ១ ម៉ែត្រការ៉េផងដែរ ប៉ុន្ដែវាអាស្រ័យទៅលើទំហំដី ទីតាំង ផ្លូវតូចឬផ្លូវធំ និងចម្ងាយពីព្រលានយន្ដហោះតែប៉ុណ្ដោះ។ នេះបើតាមការបញ្ជាក់បន្ថែមពីអ្នកជំនាញអចលនទ្រព្យជើងចាស់រូបនេះ។

សូមជម្រាបដែរថា ក្រុមហ៊ុន Amatak Property Service Co, Ltd គឺជាក្រុមហ៊ុនផ្ដល់សេវាទិញ លក់ ជូល អចលនទ្រព្យជាច្រើនប្រភេទដូចជា៖ ដី ផ្ទះ អគារ ខុនដូ ជាដើម។ សម្រាប់លោកអ្នកដែលចង់ប្រើសេវាកម្ម ឬចង់ស្វែងរកអចលនទ្រព្យល្អៗ អាចធ្វើការទំនាក់ទំនងទៅកាន់ក្រុមហ៊ុនតាមរយៈហ្វេសប៊ុកផេក Amatak Property Service Co, Ltd ឬតេឡេក្រាម៖ 086601472៕