អបអរសាទរ ប្រជាពលរដ្ឋនៅខេត្តកំពង់ឆ្នាំង ខណៈខេត្ដជាប់បឹងទន្លេសាបមួយនេះ ទទួលបានគម្រោងវិនិយោគបង្កើតរោងចក្រផលិតឧបករណ៍តេស្ត (អគ្គិសនី និងសីតុណ្ហភាព) ក្នុងទំហំទុនវិនិយោគប្រមាណ ៦,៥លានដុល្លារ។ ខណៈគម្រោងនេះក៏នឹងបង្កើតឱកាសការងារជាច្រើនកន្លែងផងដែរជូនពលរដ្ឋ។

យោងតាមការចេញផ្សាយដោយក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២០ ខែវិច្ឆិកា ឆ្នាំ២០២៥ គម្រោងរោងចក្រផលិតឧបករណ៍តេស្តខាងលើត្រូវបានវិនិយោគដោយក្រុមហ៊ុន EASTERN INTELLIGENT METER (CAMBODIA) CO., LTD. មានទីតាំងស្ថិតនៅក្នុងក្បាលដីលេខ 010098 (តំបន់B) ផ្លូវលំ ភូមិព្រៃពិល ឃុំឈូកស ស្រុកកំពង់ត្រឡាច ខេត្ដកំពង់ឆ្នាំង។ នៅពេលបើកដំណើរការគម្រោងរោងចក្រថ្មីនេះ នឹងផ្ដល់ឱកាសការងារចំនួន ៨៨៦ នាក់ជូនពលរដ្ឋក្នុងតំបន់ផងដែរ។

គួរជម្រាបផងដែរថា ចាប់តាំងពីខែមករា រហូតដល់ខែតុលា ឆ្នាំ២០២៥ ខេត្ដកំពង់ឆ្នាំងទទួលបានគម្រោងវិនិយោគថ្មីៗចំនួន ១៧ គម្រោង។ ខណៈកាលពីពេលថ្មីៗកន្លងទៅនេះ ទើបទទួលបានគម្រោងរោងចក្រដំឡើងរថយន្ដ Chevrolet និងរថយន្ដ GAC ដែលវិនិយោគដោយក្រុមហ៊ុន ធីអេច អូតូម៉ូធីវ មេនូហ្វេកឆឺរីង ឯ.ក (TH Automotive manufacturing) មានទុនសរុប ១៩ លានដុល្លារ៕