លទ្ធផលនៃកិច្ចជំនួបរបស់ ឯកឧត្តម សុខ សូកេន រដ្ឋមន្រ្តីក្រសួងទេសចរណ៍ និង លោកជំទាវបណ្ឌិត Devynai Khobragade ឯកអង្គរដ្ឋទូតវិសាមញ្ញ និងពេញសមត្ថភាពនៃប្រទេសឥណ្ឌាប្រចាំនៅកម្ពុជា បានពិភាក្សាគ្នាស្វែងរកឱកាស និងការអភិវឌ្ឍន៍គោលដៅទេសចរណ៍ដើម្បីជំរុញឱ្យលំហូរភ្ញៀវទេសចរទៅវិញទៅមករវាងប្រទេសទាំងពីរ កាលពីថ្ងៃទី២២ ខែកញ្ញា ឆ្នាំ២០២៣ កន្លងទៅ។
ក្នុងនោះ ឯកឧត្តមរដ្ឋមន្រ្តី បានថ្លែងអំណរគុណដល់ លោកជំទាវឯកអគ្គរដ្ឋទូត និងរដ្ឋាភិបាលសាធារណរដ្ឋឥណ្ឌា ដែលបានគាំទ្រនូវគម្រោងអភិវឌ្ឍន៍ទេសចរណ៍កម្ពុជា ដែលក្នុងនោះមានគម្រោងផលរហ័សចំនួន៣ ដើម្បីជួយជំរុញវិស័យទេសចរណ៍នៅកម្ពុជា៖
១. ការអភិវឌ្ឍន៍កម្មវិធីទូរស័ព្ទដៃ ដើម្បីផ្សព្វផ្សាយសហគមន៍ និងអេកូទេសចរណ៍
២. ការលើកកម្ពស់សកម្មភាពអេកូទេសចរណ៍ នៅក្នុងសហគមន៍អេកូផាត់សណ្តាយ នៅខេត្តកំពង់ធំ
៣. ការលើកកម្ពស់ការអភិវឌ្ឍន៍សហគមន៍អេកូទេសចរណ៍ បឹងស្នេហ៍ នៅខេត្តព្រៃវែង ។
បន្ថែមពីនេះភាគីទាំងពីរក៏បានផ្លាស់ប្តូរយោបល់គ្នាក្នុងការជុំរុញវិស័យទេសចរណ៍បន្ថែមទៀត។ លើសពីនេះ ឯកឧត្តមរដ្ឋមន្រ្តី្ក និងលោកជំទាវអគ្គរដ្ឋទូត ក៏បានឯកភាពគ្នាក្នុងការជុំរុញឱ្យមានជើងហោះហើរត្រង់រវាងប្រទេសទាំងពីរឱ្យកាន់តែច្រើន។
ជាចុងក្រោយ ឯកឧត្តម សុខ សូកេន រដ្ឋមន្រ្តីក្រសួងទេសចរណ៍ និង លោកជំទាវបណ្ឌិត Devynai Khobragade ឯកអង្គរដ្ឋទូតឥណ្ឌាប្រចាំនៅកម្ពុជា បានបេ្តជ្ញារួមគ្នាក្នុងការលើកកម្ពស់កិច្ចសហប្រតិបត្តិការទេសចរណ៍បន្ថែមទៀត តាមរយៈការលើកកម្ពស់ទំនាក់ទំនង សង្គម-វប្បធម៌-សេដ្ឋកិច្ច និងការកសាងទំនាក់ទំនងរវាងប្រជាជននឹងប្រជាជន៕
អត្ថបទដោយ៖ ពីង ជូអេង
