បន្ទាប់ពីបាត់មុខមួយរយៈ មេធំក្រុមហ៊ុន Alibaba មហាសេដ្ឋី Jack Ma បានត្រឡប់មកវិញព្រមទាំងបញ្ចេញ AI ថ្មីរបស់ខ្លួន មានឈ្មោះថា Qwen 2.5 ល្បីពេញប្រទេសចិនថាខ្លាំងជាង Ai DeepSeek ដែលមានការទទួលស្គាល់យ៉ាងខ្លាំងកាលពីខែមករាកន្លងទៅ។
ស្ថិតក្រោមក្រុមហ៊ុនបុត្រសម្ព័ន្ធនៃ Alibaba Group Holding វេបសាយ AI Qwen គឺជាគំរូភាសាធំមួយដែលត្រូវបានបង្កើតឡើងដោយ Alibaba Cloud ចាប់តាំងពីខែកក្កដា ឆ្នាំ២០២៤ និងដាក់ឱ្យប្រើប្រាស់នៅចុងខែមករា ឆ្នាំ២០២៥។
AI Qwen មានបំពាក់នូវមុខងារធំៗដូចជា បង្កើតរូបភាព កូដកុំព្យូទ័រ ធ្វើផែនការ ប្រាប់ព័ត៌មាន បង្កើតវីដេអូ វិភាគរូបភាព សង្ខេបអត្ថបទ ផ្តល់ដំបូន្មាន ជួយសរសេរ បំផុសគំនិត និងមើលវត្ថុបុរាណជាដើម។ លើសពីនេះក៏មានមុខងារមួយចំនួនទៀត ដែលមិនទាន់ដាក់ឱ្យដំណើរការផងដែរ។
យ៉ាងណាមិញកាលពីពេលថ្មីៗនេះមានសេចក្តីថ្លែងការណ៍មួយរបស់ក្រុមហ៊ុន Alibaba បានបញ្ជាក់ថា ក្រុមហ៊ុន Alibaba គ្រោងនឹងវិនិយោគយ៉ាងហោចណាស់៣៨០ពាន់លានយន់ ស្មើនឹង៥៣ពាន់លានដុល្លារ ក្នុងរយៈពេល ៣ឆ្នាំខាងមុខ ដើម្បីជំរុញដំណើរការហេដ្ឋារចនាសម្ព័ន្ធ AI។
សូមរំលឹកថាមហាសេដ្ឋី Jack Ma ស្ថាបនិក Alibaba ធ្លាប់បាត់មុខអស់រយៈពេលជាច្រើនឆ្នាំ ពោលគិតចាប់តាំងពីឆ្នាំ២០២០ ពេលដែលនិយាយរិះគន់អំពីនិយតករហិរញ្ញវត្ថុប្រទេសចិន។ មហាសេដ្ឋីរូបនេះក៏ធ្លាប់បាននិយាយពាក់ព័ន្ធនឹងបញ្ញាសិប្បនិម្មិត (AI) ថារយៈពេល ២០ ឆ្នាំខាងមុខ AI នឹងនាំមកនូវការផ្លាស់ប្តូរលើសពីការគិត៕
អត្ថបទដោយ៖ ពីង ជូអេង
