យុទ្ធសាស្ត្រសង្គ្រាមទីផ្សារត្រជាក់ ក្បួនទី១៖ ចូលទីផ្សារឲ្យបានមុនគេ

0
2841

មនុស្សជាច្រើនតែងតែលើកឡើងថា “ដើម្បីអាចក្តោបក្តាប់ទីផ្សារមួយបាន គេត្រូវតែមានផលិតផលដ៏ល្អអស្ចារ្យមួយ ដែលគូប្រកួតប្រជែងរ​បស់ខ្លួនគ្មាន នោះគេនឹងអាចក្តោបក្តាប់ទីផ្សារបានជាក់ជាពុំខានឡើយ”។​ តើអ្នកយល់យ៉ាងណា ចំពោះការលើកឡើងខាងលើនេះ? តើមានផលិតផលល្អហើយ នឹងអាចក្តោបក្តាប់ទីផ្សារបានហើយឬយ៉ាងណា? ចុះហេតុអ្វីផលិតផលខ្លះល្អហើយ បែរជាមិនអាចក្តោបក្តាប់ទីផ្សារប្រជែងជាមួយផលិតផលដែលមានគុណភាពអន់ជាងខ្លួនបាន?

ចំពោះការលើកឡើងខាងលើ ខ្ញុំសុំឆ្លើយថា វាមិនពិតនោះទេ ដែលអ្នកចាំបាច់ត្រូវតែមានផលិតផលដ៏ល្អអស្ចារ្យមួយដើម្បីអាចហក់ចូលនិងក្តោបក្តាប់ទីផ្សារបាន។ ជាឧទាហរណ៍ចំពោះផលិតផលភេសជ្ជៈ យើងឃើញថាមានភេសជ្ជៈមួយចំនួនមានរសជាតិឆ្ងាញ់និងគុណភាពល្អជាងភេសជ្ជៈកូកាកូឡា ប៉ុន្តែសួរថាហេតុអ្វីផលិតផលទាំងនោះមិនអាចប្រជែងជាមួយភេសជ្ជៈកូកាកូឡាបាន។ ចម្លើយនោះគឺ ដោយសារកូកាកូឡា បានហក់ចូលទីផ្សារបានមុន ជ្រាបចូលចិត្តអ្នកប្រើប្រាស់បានមុនគេ ហើយជាពិសេសជាងនេះទៅទៀតនោះ គឺបច្ចុប្បន្នក្រុមហ៊ុនកូកាកូឡាមានទុនមហាសាលរាប់ពាន់លានដុល្លារទៅហើយ។ មិនតែប៉ុណ្ណោះ កូកាកូឡាបានដណ្តើមផ្តាច់មុខទៅលើភេសជ្ជៈដែលមានជាតិហ្គាស នៅពេលមនុស្សម្នាចង់ញាំភេសជ្ជៈដែលមានជាតិហ្គាស គេនឹងនឹកឃើញដល់កូកាកូឡា។ ចូរចាំថា អ្នកមិនងាយទៅធ្វើការប្រកួតប្រជែងជាមួយក្រុមហ៊ុនដ៏ធំមួយដែលមានទុនមហាសាលរួចស្រេចទៅហើយនោះទេ ធ្វើដូច្នេះ យុទ្ធសាស្រ្តទីផ្សាររបស់អ្នកនឹងផ្ទុយជាមួយគោលការណ៍ទីមួយនៃច្បាប់យុទ្ធសាស្រ្តប្រកួតប្រជែងទីផ្សារជាក់ជាពុំខានឡើយ។

ចុះតើត្រូវធ្វើដូចម្តេចដើម្បីអាចជ្រៀតចូលទីផ្សារបាន?


វិធីសាស្រ្តដ៏ល្អបំផុតមួយដើម្បីអាចជ្រៀតចូលទីផ្សារមួយបានគឺ ការបង្កើតទីផ្សារផលិតផលថ្មីមួយដែលខុសប្លែកទីគូប្រកួតប្រជែងដទៃទៀត ដើម្បីអាចហក់ចូលទីផ្សារឲ្យបានមុនគេ ហើយក្បួនបែបនេះគេហៅថា “យុទ្ធសាស្រ្តចូលទីផ្សារឲ្យបានមុនគេ”។ នៅក្នុងយុទ្ធសាស្រ្តទីមួយនេះ គេបានពន្យល់ថា ការកាន់ផលិតផលមួយចូលទីផ្សារឲ្យបានមុនគេ ប្រសើរជាងកាន់ផលិតផលល្អ ប៉ុន្តែចូលទីផ្សារក្រោយគេ។ អ្នកត្រូវដឹងថា ផលិតផលសាមញ្ញមួយដែលបានចូលទីផ្សារមុនគេ ហើយជ្រាបចូលអារម្មណ៍របស់អតិថិជនមុន វាមានប្រសិទ្ធភាពជាងផលិតផលល្អមួយដែលចូលក្រោយ ហើយព្យាយាមផ្លាស់ប្តូរអារម្មណ៍ដែលអតិថិជនកំពុងដក់ជាប់ក្នុងចិត្តរួចបាត់ទៅហើយ។

ដើម្បីអាចស្វែងយល់កាន់តែច្បាស់ពីក្បួននៃការចូលទីផ្សារឲ្យបានមុនគេនេះ ខ្ញុំសូមលើកយកឧទាហរណ៍ជាក់ស្តែងមួយដែលបានកើតឡើងកាលពីប៉ុន្មានទសវត្សន៍មុន ហើយយើងក៏អាចយកវាមកប្រៀបធៀបនិងប្រើប្រាស់សម្រាប់ក្បួនយុទ្ធសាស្រ្តទីផ្សារបានផងដែរ៖

សំណួរទីមួយ១៖ តើអ្នកដឹងថាណាអ្នកជាមនុស្សដំបូងគេ ដែលបានបើកយន្តហោះឆ្លងកាត់មហាសមុទ្រអាត្លង់ទិក?

មនុស្សភាគច្រើនប្រាកដជាស្គាល់ហើយថា អ្នកដែលបានបើកយន្តហោះឆ្លងកាត់មហាសមុទ្រអាត្លង់ទិកមុនគេនោះគឺជាលោក Charles Lindbergh។

សម្រាប់សំណួរបន្ទាប់ តើនរណាជាមនុស្សទី២ដែលបានបើកយន្តហោះឆ្លងកាត់មហាសមុទ្រអាត្លង់ទិក? សំណួរនេះពិតជាមិនងាយស្រួលឆ្លើយ ឬចងចាំនោះទេ។

បុរសទី២ដែលបានបើកយន្តហោះឆ្លងកាត់មហាសមុទ្រអាត្លង់ទិកគឺលោក Bert Hinkler ដែលជាមនុស្សមានជំនាញនិងបទពិសោធន៍ខ្លាំងជាងលោក Charles Lindbergh។

សំណួរសួរថា ហេតុអ្វីបានជាមនុស្សភាគច្រើនមិនស្គាល់ឬចងចាំបុរសទី២ដែលបានបើកយន្តហោះឆ្លងកាត់មហាសមុទ្រអាត្លង់ទិក ខណៈដែលអ្នកទី២នេះជាពីឡុតដែលពូកែបើកយន្តហោះ ចំណាយពេលតិចជាង និងសាំងតិចជាងអ្នកទី១? ប៉ុន្តែមនុស្សភាគច្រើនមិនបានចាំឈ្មោះរបស់អ្នកទី២នេះទេ គេស្គាល់និងចងចាំឈ្មោះរបស់ពីឡុតទី១គឺលោក Charles Lindbergh ជាងជាងអ្នកទី២។ ទោះបីជាយ៉ាងណាក៏ដោយ គេសង្កេតឃើញថា ក្នុងតថភាពជាក់ស្តែងនៃការធ្វើអាជីវកម្ម ក៏នៅតែមានក្រុមហ៊ុននិងម្ចាស់អាជីវកម្មជាច្រើននៅតែដើរតាមលំនាំលោក Bert Hinkler ដដែល។

ដកស្រង់ពីចំណុចខ្លះៗត្រង់ក្បួនទី១នៃសៀវភៅ៖ សង្គ្រាមទីផ្សារត្រជាក់ (ក្បួនវាយលុកសមរភូមិទីផ្សារ២២ចំណុចដែលអាចប្រើប្រាស់បានគ្រប់កាលៈទេសៈ) ដែលនឹងចេញលក់ក្នុងពេលឆាប់ៗខាងមុខនេះ។

អត្ថបទដោយ៖ SOY-VUTHEA

អ្នកសរសេរអត្ថបទ Startup & Franchise

LEAVE A REPLY

Please enter your comment!
Please enter your name here