ផែ​ពហុ​បំណងក្រុងព្រះសីហនុ​ តម្លៃប្រមាណ ៧៤លានដុល្លារ​ នឹងដាក់ឱ្យដំណើរការក្នុងខែនេះ

0
1296

ចំណតផែពហុបំណង តម្លៃប្រមាណជា ៧៤លានដុល្លារអាមេរិក នឹងបើកឱ្យដំណើរការនៅថ្ងៃទី ២៥ ខែមិថុនានេះ ដើម្បីជម្រុញដល់សង្វាក់នៃការដឹកជញ្ជូននាំចេញនាំចូល ទំនិញទៅកាន់ទីផ្សារអន្តរជាតិឱ្យកាន់តែល្អប្រសើរ។ នេះបើតាមប្រសាសន៍របស់ លោក លូ គីមឈន់ កាលពីម្សិលមិញនេះ ។

ប្រធាន​ក្រុមហ៊ុន​កំពង់ផែ​ស្វយ័ត​ក្រុង​ព្រះសីហនុ(PAS) លោក លូ គីមឈន់ បានបញ្ជាក់ថា ​ការបើកឱ្យ​ដំណើរការ​ផែពហុ​បំណង​នេះ ​នឹង​ធ្វើ​ឡើង​ក្រោម​អធិបតីភាពរបស់​ នាយករដ្ឋមន្រ្តី ហ៊ុន សែន ហើយ​នៅ​ពេល​ដែល​ផែ​ថ្មី​នេះ​ប្រតិបត្តិការហើយ ​អាចឱ្យនាវា​ដែល​ផ្ទុក​ទំនិញ​ចំណុះពី ៤០ ០០០ តោន​ទៅ ៥០ ០០០ ​តោន​​ចូល​ចត​នៅ​ផែនេះ​បាន​។ លោកបន្ថែបថា “នៅពេល​ផែ​សមុទ្រ​នេះ​ស្ថិត​នៅ​ទឹក​ជ្រៅ​នឹង​អាច​ឱ្យ​នាវា​ធំៗ​ចូល​ចត​ជាមួយ​នឹង​ទំនិញ​ធ្ងន់ៗ​បាន ហើយការចំណាយ​លើ​ការដឹកជញ្ជូន​តាមរយៈ​សមុទ្រ​នឹង​កាន់តែ​ទាប​”​។

គូរំលឹកផងដែរថា ចំណត​ផែ​ពហុ​បំណងនេះ មានទីតាំងស្ថិតក្នុងបរិវេនកំពង់ផែស្វយ័តក្រុងព្រះសីហនុ ដោយបានចាប់ផ្ដើម​សាងសង់​ឡើង នៅ​ដើម​ឆ្នាំ​២០១៥  និងបានកម្ចី​ការប្រាក់​ទាប​ពី​ទីភ្នាក់ងារ​អភិវឌ្ឍន៍​ជប៉ុន JICA​ ប្រមាណ ១៧៦លានយេន ស្មើប្រមាណ ៧៤ លានដុល្លារអាមេរិក។  ចំណតផេនេះ មានប្រវែង ៣៣០ម៉ែត្រ ​និងជម្រៅទឹក ១៣,៥ម៉ែត្រ ដោយមានទីលានស្តុកទំនាញរាយទំហំ ២៨០០០ម៉ែត្រការ៉េ  និងទីលានស្តុកធ្យូងថ្មទំហំ ១៣០០០ម៉ែត្រការ៉េ  រួមជាមួយទីលានស្តុកទំនិញទូទៅ ១៤០០០ម៉ែត្រការ៉េ។


សូមបញ្ជាក់ថា ​ចំណតផេនេះ​ គឺជាគម្រោង​អាទិភាព​មួយ​ដែល​ត្រូវបាន​កសាងឡើង​ដើម្បី​ជួយ​ជម្រុញ​ដល់​វិស័យ​កសិកម្ម ឧស្សាហកម្ម ពាណិជ្ជកម្ម និង​ជា​ពិសេស ការនាំ​ចេញ​នូវ​កសិផល​របស់​កម្ពុជា ដូចជា​ចំណិត​ដំឡូង​មី​ស្ងួត ទំនិញ​រាយ និង​ដើម្បី​ឆ្លើយតប​ទៅនឹង​យុទ្ធសាស្ត្រ​ពង្រីក​ទីផ្សារ​នាំចេញ​អង្ករ​របស់​រាជរដ្ឋាភិបាល​ផងដែរ៕

អត្ថបទដោយ៖ ម៉េង សុងលី

 

LEAVE A REPLY

Please enter your comment!
Please enter your name here